Уи ишазгәеиҭаз ала, аконте­инертә дәыӷба – ари алогистикатә сервис ауп, даҽакала иуҳәозар, аграфик инақәыр­шәаны иахьдәықәло астанциа аҟынтәи амҩа ахьхоу астанциа аҟынӡа иныҟәо аидарамҩангагатә дәыӷба ауп.  Уахыки-ҽнаки рыла иарбоу адәыӷба аццакра 800 - 1000 километр рҟынӡа инаӡоит. Иаагозар, аидарамҩангагатә дәыӷба 10-14 мшы рыла иаауазар, аконтеинертә дәыӷба ҩынтә рҟынӡа ирласны инаӡоит.

«Аихамҩақәа рхархәарала аус зуа аилазаарақәа еиҳа аԥыжәа­рақәа рымоуп – уи аидара аагаразы иақәырӡхо аамҭеи аидара аиагара азы ахәԥсеи реиҵатәра ауп. Ҳазгәаҭарақәа рыла, 25-30% рыла еиҵоуп. Аконтеинер – ари иуниверсалу хархәагоуп, уи аидара аҵәахреи ашьҭаҵареи рзы ахархәара ҟалоит, иара аихамҩатә платформа иақәыхны даҽаџьара еиҭаугар алшоит. Аидарақәа убри аан ԥырхага роуӡом», ҳәа иҳәеит Оқтаи Хазириши. Уи иажәақәа рыла, ас еиԥш аидеиа «Аԥснытәи аихамҩа» анапхгара ирызцәырҵит аидарамҩангара амҽхак арҭбаареи, аидарақәа рыхкырацәарахь аиасреи рзы. «Ари аидеиа Аԥсны азы иҿыцуп. Ареспубликатә унитартә наплакы «Аԥснытәи аихамҩа» араҟа аидарамҩангаҩы иаҳасабала иқәгылоуп» иҳәеит Оқтаи Хазириши. Уи иажәақәа рыла, адәыӷба ааигәа Аԥснытәи аҳәаа аҟынӡа иааӡоит. «Ашьжьымҭан иҟаз аинформациа ала, уи астанциа «Тихорецкая» аҟынӡа иааихьан, уаантәи аҳәаа аҟынӡа 200 километр роуп ибжьоу, уаҵәы уи аҽеиԥшьратә станциа «Веселое» аҟынӡа инаӡароуп. Уажәы хықәкыс иҳамоу адәыӷба адкылареи аус адулара алыршареи роуп», – ҳәа иажәа хыркәшо, иҳәеит иара.