Леуан Адлеиба иажәақәа рыла, Аԥсны ацәыргақәҵа-ҭӡы иаҭаауа акыр ирацәаҩуп, уи акыр аинтерес аҵаны иҟоуп. «Ҳара Урыстәыла атәылауаа рҭахрақәа ҷыдала ирықәшәо ахырхарҭақәа хәба ҳреиуоуп. Урыстәылатәи Афедерациа арегионқәа аус рыцура аиқәшаҳаҭрақәа рнапаҵаҩразы агәҭакқәа ҳамоуп. Иахьа ацәыргақәҵа аусура раԥхьатәи амш акәын, ҳара ҳаҭӡы иаҭаауан хыԥхьаӡара рацәала ауаа, азҵаарақәа ҳарҭон. Аԥсны, ахәҭакахьала, Аҟәа ақалақь иазку акаталогқәа ирызҿлымҳан. Агәыӷра сымоуп аимабзиаратә еимадара абжьаҵара анаҩсгьы, уи хра злоу алҵшәақәа раарԥшрагьы шалыршахо», – ҳәа иҳәеит Леуан Адлеиба.
Москва ақалақь аҿы хәажәкырамза 16 – 18 рзы имҩаԥысит ари ацәыргақәҵа.
