Мшаԥымза 4 инаркны 7 аҟынӡа Аахыҵ-Уаԥстәыла имҩаԥысраны иҟоуп Аԥсны акультура Амшқәа. Цхинвал ақалақь аҿы аҿар ртеатри, жәлар рыкәашареи рышәаҳәареи аҳәынҭқарратә ансамбли ықәгылараны иҟоуп.
Аԥсны акультура Аминистрра апресс-маҵзура иҟанаҵо адыррақәа рыла, Аԥсны акультура Амшқәа раартра иазку аныҳәатә усмҩаԥгатәқәа хацыркхоит мшаԥымза 5 рзы. К. Л. Хетагуров ихьӡ зху Аҳәынҭқарратә драматә театр аҟны ахәаԥшцәа идырбахоит Аԥсны аҳәынҭқарратә аҿар ртеатр инанагӡо Аԥсны жәлар рышәҟәыҩҩы Шьалодиа Аџьынџьал иажәабжьқәа рмотивқәа рыла иқәыргылоу аспектакль «Аибашьра ахымш рҽны». Мшаԥымза 6 рзы Аԥсны зҽаԥсазтәыз жәлар рыкәашареи рышәаҳәареи Рҳәынҭқарратә ансамбли аԥсуа естрада артистцәеи рықәгылара азгәаҭоуп.
«Ари ҳатрадициақәа, ҳҭоурых, ҳкультура азнагаразы зеиӷьаҟам лшароуп. Ҳара аҩганктәи акультуратә усмҩаԥгатәқәа ралыршаразы ҳаиқәшаҳаҭхахьан, абар сынтәа уи зегьы анагӡара ҳгәы иҭоуп. Мшаԥымза 4-7 рзы Аԥсны акультура Амшқәа мҩаԥаагоит, анаҩс ҭак ҳасабала Аԥсны имҩаԥысуеит Аахыҵ-Уаԥстәыла акультура Амшқәа», – ҳәа иазгәеиҭеит Аԥсны акультура аминистр
Даур Ақаҩба иара убас аиашьаратә республикақәа рыбжьара акультуратә еимадарқәа рырҭбаараҿы акультура Амшқәа рҵакы инаҵшьны иазгәеиҭеит.
