«15 шықәса уажәаԥхьа Аԥсни Аахыҵ-Уаԥстәылеи рхьы­ԥшымра азхаҵаны, Урыстәылатәи Афедерациа ахашҟа иагеит урҭ уаҩы дақәгәыӷыртә еиԥш рыхьчара, ԥхьаҟатәи рҿиара, ҳаамҭа иақәшәо, инагоу ҳәынҭқаррақәак раҳасабала рышьақәгылара. Аԥсни Аахыҵ-Уаԥстәылеи руааԥсыра реиҳараҩык Урыстәылатәи атәылауаҩра рымоуп, Урыстәылаҿы аидгылара арҵаулара иадгылоит. Ҩ-ганктәи аусеицура ахырхарҭаҵәа зегь рыла акырӡа зҵазкуа алҵшәақәа алыр­шахеит. Ари Аҟәеи Цхинвали рдәны­ҟа­политикатә, рекономикатә позициақәа рырҕәҕәаразы аҭагылазаашьақәа аҧырҵоит».

Аҧсни Аахыҵ-Уаҧстәылеи реизыҟазаашьақәа реидгыларатә ҟазшьаҵәҟьа аганахьала ҿырҧштәык аҳасабала Захарова иаалгеит урҭ арратә операциа ҷыда, До­нецктәи Лугансктәи ареспу­бликақәа, Запорожиатәи Херсонтәи аобластқәа Урыстәылатәи Афедерациа ралалара иахьадгылауа.

Захарова лажәақәа рыла, Урыстәылан аҵак ҷыда арҭоит Аԥсни Аахыҵ-Уаԥстәылеи ршәа­рҭадара алыршара.

«Урҭ рыдгьылҵакыраҿы иҟоуп Урыстәылатәи арратә базақәа, адәахьала апровокациақәа ҟамларц азы аҳәынҭҳәаақәа еицырыхьчоит. Ари хра алоуп агеополитикатә ҵабыргхаҭа ҿыцқәа раан. Абарҭ атәылақәа ирҿагыланы амч ахамырхәаразы аиқәшаҳаҭрақәа Қырҭтәыла аҟнытә алыршара ҳаҿуп. Абраҟа иаабоит арегион аҟны аҭышәынтәалара ашьаҭа», – иазгәалҭеит лара.

Захарова иаҵылшьит Урыстәыла ахәаахәҭратә ҩыза хаданы ишыҟоу Аԥсни Аахыҵ-Уаԥстәылеи рзы. Ишьҭыҵуеит наҟ-ааҟ атауареикәыршара.

«Аҵак ҷыда азалхуп асоциал-економикатә рҿиара. Абарҭ азҵаарақәа ирыхәаԥшуеит аиҳабырбжьаратә комиссиақәа. Урҭ аҵыхәтәантәи реилатәарақәа мҩаԥысит ааигәа. Инарыгӡоит абарҭ арес­публикақәа ирызку аинвестициатә програмақәа. Урҭ ҵакыс ирымоу анаплак ҿыцқәеи аусурҭа ҭыԥқәеи раԥҵара, ауаа рыԥсҭазаара аиӷьтәра ауп», – лҳәеит лара.

Урыстәыла иара убас хьыӡҳәала ацхыраара анаҭоит аенергетикеи, атранспорти, ааглыхреи, ақыҭанхамҩеи рырҿиара.

«Иааидкыланы абарҭ аусмҩаԥгатәқәа ацхыраауеит еизаку аҩнуҵҟатәи аалыҵи атәылауаа рбзазаратә ҭагылазаашьеи рышьҭыҵра, аинвестициақәа радыԥхьалара, амилаҭтә биуџьетқәа рхашәалатә хәҭа ашьҭыхра.  Ари ҳзеиԥш интересқәа ирыҵаркуеит, иаԥырҵоит ашәарҭадара, идырҭбаауеит аалыҵ аҭира аџьармыкьақәа, атуристтә, аустә ныҟәарақәа рылшарақәа», – лҳәеит Мариа Захарова.

Урыстәылеи, Аԥсни, Аахыҵ-Уаԥстәылеи рыжәларқәа реидгылара, Захарова лажәақәа рыла, аҵареи, акультуреи, аҭҵаарадырреи, аспорти рганахьала аусеицурагьы иацхраауеит.

«Аԥснытәи Аахыҵ-Уаԥстәылатәи абитуриентцәа Урыстәыла иреиҳау аҵараиурҭақәа рҿы аҭыԥқәа рзалырхуеит, аҳәынҭмаҵзуҩцәеи арҵаҩцәеи рҵарадырра шьҭырхуеит Урыстәылатәи аусҳәарҭақәа рҟны, абаҩхатәра змоу аҿар рхы рыладырхуеит Урыстәыла анапхгарала имҩаԥысуа жәларбжьаратәи афорумқәа, аконкурсқәа. Хшыҩзышьҭра ҷыда рзыруеит азеиԥш ҭоурых иаҵанакуа агәалашәаратә рыцхәқәа ирыдҳәалоу апатриоттә аԥшьгамҭақәа. Атәылақәа рырҿиаратә коллективқәа агастрольқәа еимырдоит, амилаҭтә ныҳәақәа раан аконцерттә программақәа рыла иқәгылоит», – иазгәалҭеит лара.