Аиԥылара ааиртит Ареспублика Ҭаҭарсҭан Аԥыза-министр ихаҭыԥуаҩ – аекономика аминистр Мидхат Шагиахметов. Уи аинвесторцәа рзы арегион иамоу дрылацәажәеит, иара убас арезидентцәа рзы иҟоу азинҷыдақәа, анаплакқәа рынхамҩатә усура ахылаԥшра шеиҿкаау, иҟоу аҭагылазаашьақәа раан Ҭаҭарсҭан аекономика аҿиара шымҩаԥысуа уҳәа дырзааҭгылеит.  

Иара убас аҳәынҭқарратә заказ азы Амаҵзура адиректор хада Иаков Геллер еизаз ирзеиҭеиҳәеит уаанӡа иаархәоз аҳәа­анырцәтәи атауар амыцхәра ахарҭәааразы ареспуб­ликатә маркетингтә Центр абазаҿы  Урыстәылатәи, Ҭаҭарсҭантәи аҭыжьыҩцәеи, аиқәыршәаҩцәагьы уахь иналаҵаны, зыдгалара мҩаԥырго аалыҵ акаталог ҷыда шеиқәыршәоу иҳәеит. Аиԥылараҿы ибжьаратәуи имаҷууи абизнес асубиектқәа рзы апрограммақәеи аинструментқәеи амаҵзурақәеи рынагӡара аганахьала иҟоу аԥышәа атәы еиҭарҳәеит аусдкылареи аконкуренциеи рырҿиаразы Адепартамент адиректор ихаҭыԥуаҩ Емиль Хисматови Ҭаҭарсҭан аусдкыларазы Афонд адиректор Салихов Аидари. Аганқәа аусдкылара иазкны ҳаԥхьаҟа аусеицуразы еиқәшаҳаҭхеит.

* * *

Ареспублика Ҭаҭарсҭан Высокогорски, Тетиушски, Заински араионқәеи  Аҟәатәи, Гагратәи, Гәдоуҭатәи араионқәеи аусеицуразы аиқәшаҳаҭра рыбжьарҵеит. Ҭаҭарсҭантәи амуниципалитетқәа рхаҭарнакцәеи Аԥснытәи аделегациа ахаҭарнакцәеи  реиԥылара Ареспублика Ҭаҭарсҭан амуниципалтә еиҿкаарақәа Рхеилак аҿы имҩаԥысит.

Аиԥылара аартуа, Ҭаҭарсҭан амуниципалтә еиҿкаарақәа Рхеилак ахантәаҩы  Екзам Губаидуллин аделегатцәа ирзеиҭеиҳәеит Ҭаҭарсҭан ишьақәгылаз аҭыԥантәи ахаланапхгара асистема атәы. Ирылацәажәан амуниципалтә мчра аусбарҭақәа реилазаашьа, ареспубликатәи амилаҭтәи программақәа рынагӡара, актуалра злоу апроблемақәа рыӡбаразы амуниципалтә грантқәа рзоужьра уҳәа  актуалра злоу аусура ахырхарҭақәа. Иқәгылоз иара убас дазааҭгылеит аҭыԥантәи ахаланапхгаратә усбарҭақәа рматериал-техникатә база арӷәӷәара, амассатә информациа ахархәагақәеи амуниципалтә усзуҩцәеи рзы аконкурсқәа рымҩаԥгара, амуниципалтә усзуҩцәа рзанааҭтә ҩаӡара ашьҭыхра уҳәа азҵаарақәа.  

Ахәҭакахьала, Аԥсны Аԥыза-министр ихаҭыԥуаҩ, аекономика аминистр Кристина Озган атәыла асоциал-економикатә ҭагылазаашьеи аҭыԥантәи ахаланапхгара аусуреи дырзааҭгылеит. Аԥсны амуниципалитетқәа рҿы иҟоу атенденциа иалацәажәеит иара убас Аҟәа, Гагра, Гәдоуҭа уҳәа Аԥсны егьырҭ араионқәа рхадарақәа рхаҭарнакцәагьы.

Анаҩс аре­спубликақәа рму­ниципалтә еиҿкаарақәа рыбжьара ахәаахәҭра-економикатә, анаука-техникатә, акультуратә уҳәа егьырҭ аусхкқәа рыла аусеицуразы аиқәшаҳаҭрақәа рнапы аҵарҩит Аҟәа араион ахада Алхас Ҷыҭанааи Ҭаҭарсҭан Высокогорни араион ахада Равиль Хисамутдинови, Гагра араион ахада актәи ихаҭыԥуаҩ Адамыр Ҵышәбеи Тетиушски араион ахада Рамис Сафиуллови, Гәдоуҭа араион ахада Баграт Боџьгәуеи Заински араион ахада ихаҭыԥуаҩ Пиотр Уразаикини.