«Аҵыхәтәантәи ҩымз рыҩнуҵҟала ҳҳақьымцәа аџьабаа ӷәӷәа рыман, мышкы ахәышәтәырҭахь идҵаалауан 200-ҩык рҟынӡа. Аҟәа ахадареи агәабзиарахьчара Аминистрреи иҟарҵо адгылара иабзоураны ачымазаҩцәа хәыда-ԥсада ирхәышәтәуеит», – иазгәеиҭеит Гәыниа. Уи иҳәеит аҳҭны-қалақь анапхгара рыцхыраарала ааигәа ишырҽеиз ашьҭаҵарҭақәа, аӡышьҭрақәа актәи аҩбатәи аихагылақәа рҟны, иара убас ахәыҷқәа рыҟәша ахәыҟаҵарҭа иагу-иабзоу ҟаҵан.
Аилацәажәара ашьҭахь Едуард Быҭәба ачымазаҩцәа дырҭааит, интересс иман урҭ ргәабзиара зеиԥшоу.
«Ҭабуп ҳәа расҳәарц сҭахуп амедицинатә усзуҩцәа зегьы, ачымазаҩцәа абас рзыҟазаашьа бзиа исымбацызт. Ирҭаху ахәшәқәа зегьы рырҭоит, гьамала акрырҿарҵоит, даара ибзианы ирызнеиуеит», – лҳәеит ачымазаҩцәа руаӡәк.
Едуард Быҭәба иара убас алабораториа аусура гәеиҭеит.
Асҭамыр Гәыниа иҳәеит мышкы аспециалистцәа 40 рҟынӡа аҭҵаарақәа шымҩаԥыргауа. Иара убас иазгәеиҭеит ааигәа ишаахәаз ҳаамҭазтәи ашьақәгыла ҿыц. Агәабзиарахьчара Аминистрра ахада агәра диргеит иаарылшауа зегьы шыҟарҵауа азҵаарақәа рыӡбараҿы.
Агәабзиарахьчара Аминистрра хшыҩзышьҭра ҷыда азыҟанаҵоит атәыла аҳәынҭқарратә усҳәарҭақәа зегьы иааиԥмырҟьаӡакәа фымцала реиқәыршәара. Иахьа ахәышәтәтәырҭа еибыҭоуп адизельтә генераторқәа рыла. Едуард Быҭәбагьы убарҭ русушьа гәеиҭеит. Урҭ руак аусура иаҟәыҵит, аха иаарласны идырҽеираны иҟоуп, СУЕС иабзоураны алашара ԥымкрада ирымоуп.
