«Еиҵагыло абиԥара ҿа Аԥсны Аҳәынҭқарра Аконституциа аҵакы ахьынӡар­дыруа, азин аганахьала рдыррақәа ахрархәара ахьынӡарылшауа иахьыԥшхоит ҳҳәынҭқарра ԥхьаҟатәи аԥеиԥш, ажәлар рҵара­дырра ахьынӡаҳараку. Аԥсадгьыли аҭаацәареи рыбзиа­бара инаваргыланы, ахәыҷы илааӡа­латәуп Аконституциа иазку раԥхьатәи адыррақәа. Убасҟан ихацҳаркуеит иҟәышу, иҟәыӷоу, аԥеиԥш змоу аҿар рышьақәгыларазы ауасхыр ӷәӷәа. Урҭ ҽаԥсатәралаҵәҟьа ирылшоит атәылауаҩратә уаажәларра иарбанзаалак аинститутқәа рҟны ҳтәыла хаҭарнакра азура», – лҳәеит лара.

Аҭыжьымҭа иацу асахьақәа ҭырхит ахәыҷтәы рҿиара Ацентр ааӡамҭацәа.

«Иарбанзаалак асахьа маҷ ахәыҷқәа иҭырхит, дара рыблала ишахәаԥшуа, ишырныруа ҵакыс иаҭаны. Иара убри алагьы дара еилырка­ауеит аҳәынҭқарра заку, дарбан­заалак атәылауаҩ изинқәеи ихақәиҭрақәеи зеиԥшроу, Аиҳабыреи, Жәлар Реизареи, ҳусӡбарҭақәеи русура шеиҿкаау», – лҳәеит Аԥсны Аконситуциатә ӡбарҭа аӡбаҩ Диана Ԥилиа.