«Иааиуа ашықәс алагамҭазы аҳәынҭ­қарра актәи ахаҿқәа рҟны аилацәажәара ду амҩаԥгара ҳгәы иҭоуп. Иҳармазеихьеит ауаажәларратә еиҿкаарақәа рыбжьара аиԥш, иара убас амчраҿы аусеицуразы ажәалагалақәа. Агәра згоит ари аусура алҵшәа бзиа шаиуа», – иаз­гәеиҭеит иара.

Анаҩсан ажәахә ҟазҵаз аҿари аспорти русқәа рзы Аҳәынҭеилакы аҿар рыҟәша аспециалист хада А. Ханагәуа дрылацәажәеит ҳазну ашықәс ­азы инарыгӡаз аусмҩаԥ­­гатәқәа, ҷыдала иаликааит Очамчыра имҩаԥгаз аҿар жәларб­жьаратәи рфорум «Ҳԥеиԥш еицышьа­­­­қәҳаргылап».

Уи иажәақәа рыла, 2023 шықәсазы иазгәаҭоуп аусмҩаԥ­гатәқәа 20 раҟара рынагӡара, иара убас Аԥсны жәлар Рџьынџьтәылатә еибашьраҿы Аиааира 30 шықәса ахыҵра иазку акциа «Агәала­шәара амҩақәа рыла».

Аҟәа ахадара аҿари аспорти русқәа рзы Аусбарҭа аҿар русқәа рзы аспециалист хада Бадиа иазгәалҭеит ҳазну ашықәс аҩнуҵҟала акырӡа зҵазкуа арыцхәқәа ирызкны аусмҩаԥгатәқәа шеиҿыркааз. Гәылрыԥшь араион аҿари аспорти русқәа рзы аҟәша ахантәаҩы ихаҭыԥуаҩ Арменак Карнециан игәаана­­га­рала, аусеицура ԥсыҽ мзыз хадас иамоу – аҳәынҭқарра аганахьала аҿар рполитика еилыхха иахьыҟам ауп.

Адунеизегьтәи аԥсуа-абаза конгресс аҿари афизкультуреи рырҿиаразы аҟәша аспециалист Есма Кәыҵниа иазгәалҭеит проблема хадас иҟоу аусҳәарҭақәа иааигәаны иахьеимадам ауп: «Лассы-лассы убас иҟалоит, аҿар русқәа знапы иану аспециалистцәа аӡәи-аӡәи ҳзеибадырӡом. Ҳаиба­дыруа­зароуп, аиԥыларақәа мҩаԥа­агозароуп».

Аплатформа «Аԥсны аԥеиԥш» ацхантәаҩ Милана Ҳашба иаҵылшьит амчра аусбар­ҭақәа рҟны қәҿиарала аусеицуразы аҿырԥш­тәқәа шыҟоу: «ҳапроектқәа зегьы еснагь адгылара роуан».

Россотруд­ничество ахаҭарнакра аусзуҩ Руслана Гергедава агәра ганы дыҟоуп, аҳәынҭқарра аԥеиԥш аҿар шраку.

Қәҿиарала аусура аҿырԥштәык аҳасабала уи иаалгеит ааигәа Урыстәыла аусура иалагаз «Аҿар рпарла­мент» апроект: «Абасеиԥш иҟоу апарламент ашьаҭала Аԥсны уаҩы иааӡар алшоит ҳтәылазы ԥхьаҟатәи аполитикцәа қәыԥшцәа. Аҿар бзиа ҳамоуп, аганахь иаважьтәым».