«Даара ҳалахь еиқәнаҵеит Аԥсны жәлар рартист, СССР акомпозиторцәа Реидгыла алахәыла, Д.И.Гәлиа ихьӡ зху Аҳәынҭқарратә премиа алауреат, «Аибашьра ашықәснҵара» апремиа алауреат, Леон иордени «Ахьӡ-Аԥша» аорден ахԥатәи аҩаӡареи занашьаз Тото Аџьапуа.

20 шықәса инареиҳаны Тото Аџьапуа Аԥсны Аҳәынҭ­қарратә хортә капеллаҿы аус иуит, Аԥсны амузыкатә традициақәа реиқәырхареи раларҵәареи иџьабаа адын.

Тото Ҭарашь-иԥа 600 инареи­ҳаны арҿиамҭақәа дравторуп. Уи иаԥҵамҭақәа рхыԥхьа­ӡараҿы иҟоуп акантатақәа «Аԥсуа баагәара ду», «Абрыскьал», «Ефрем Ешба», «Уарбану?», ахореогра­фиатә сиуита «Нарҭаа», афлеитеи афортепианои рзы асоната, «Аԥсуа литургиатә шәаҳәарақәа», акантатақәа «Ҷлоу», «Отаԥ», «Аԥсадгьыл азхәыц­рақәа», «Аԥсуа лаф» асимфо­ниатә оркестр азы.

Аџьапуа Тото Ҭарашь-иԥа диит 1936 ш. азы Очамчыра араион Отаԥ ақыҭан. А.М.Горки ихьӡ зхыз Аҟәатәи арҵаҩратә институт далгеит, убас Қарҭтәи аконсерваториа авокалтә, акомпозитортә ҟәшақәа. Иҵара инаваргыланы Қарҭтәи атеатртә институт аҟны аԥсышәала ацәа­жәаратә культура дирҵон. Аопереи абалети ртеатр асолист-стажиорс (1969-1991) дыҟан, анаҩсан Аԥснытәи аҳәынҭқарратә филармониа (1971), Аҳәынҭқарратә хортә капелла (1971-1992) ашәаҳәаҩыс, дирижиорс аус иуан.

Аԥсны жәлар Рџьын­џь­тәылатә еибашьра далахәын. Акомпозитор Кәасҭа Ченгелиеи иареи еиҿыркааз агәыԥ «Аиааира» аибашьцәа рҿаԥхьа иқәгылон, игәышьҭых­газ афырхаҵаратә ашәақәа нарыгӡон. Тото Аџьапуа Аԥсны акомозиторцәа Реидгыла ахантәаҩы ихаҭыԥуаҩыс, ахәыҷтәы музы­катә школ №3 адирекорс аус иухьан.

Аԥсуа музыкатә культура арҿиара зџьабаа аду, аԥсуа хаҵаҵәҟьа ҳәа ззырҳәоз Тото Аџьапуа игәалашәара наунагӡа иаанхоит дыздыруаз зегьы ргәаҵаҿы.