Уаҟа иарбоуп:
«Ҳаҭыр зқәу Михаил Алеқсандр-иԥа! Аԥсны анапхгара рыхьӡала, сара сыхьӡала гәык-ԥсыкала ишәыдаҳныҳәалоит Шәирамш!
Аԥсны Аҳәынҭқарраҿы Урыстәылатәи Афедерациа Ацҳаражәҳәаҩ ҷыда аҭакԥхықәра зцу иҭыԥ аҟны шәусура алкаауп апринципрала, азанааҭдыррала, аҳәынҭқаррабжьаратә усеицура еиуеиԥшым ахырхарҭақәа хшыҩзышьҭрала рзыҟазаашьала.
Аԥсни Урыстәылеи реидгыларатә еизыҟазаашьақәа рырҿиараҿы хаҭалатәи шәлагаламҭа иабзоураны урҭ агәылеимабзиареи аиҩызареи рҵас ала аҿиара мҩа иануп.
Шәара, Михаил Алеқсандр-иԥа, ишәзеиӷьасшьоит агәабзиара ӷәӷәа, аҭынчра, шәҭаацәараҿы аманшәалара, адипломатиатә усураҿы ақәҿиарақәа!»
Иара убас Аԥсны адәныҟатәи аусқәа рминистр Инал Арӡынба Михаил Шургалин имшира идиныҳәалеит.
Хьыбла Герзмаа
Аԥсны Ахада Аслан Бжьаниа Аԥсни Урыстәылеи жәлар рартистка Хьыбла Герзмаа лымшира лыдиныҳәалеит.
«Ҳаҭыр зқәу Хьыбла Леуарса-иԥҳа, гәык-ԥсыкала иԥхаӡа ишәыдысныҳәалоит Шәирамш!
Шәара шәыԥсҭазаара хазына ҭәуп акультура гәык-ԥсыкала амаҵзурала, шәара инашәыгӡо ашәақәа, шәбаҩхатәра ду ирыцуп хаҭала шәуаҩышьа, шәусушьа, адунеии ауааи рахь шәгәаартра.
Шәара шәбаҩхатәра ҳәаа амаӡам. Шәыԥсадгьыл аҿы имҩаԥыжәгауа афестивальқәеи егьырҭ аусмҩаԥгатәқәеи аԥсуа культуреи адунеитә культуратә ҭынхеи ацҳа рыбжьарҵоит. Шәара зинлаҵәҟьа аԥсуа культура шәаӡыргаҩуп, адунеи зегьы аҟны ауаа ргәаҵанӡа анеира шәылшеит.
Ҳаҭыр зқәу Хьыбла Леуарса-иԥҳа! Шәара акультура амаҵ жәуеит, уи хаҭәаауп арҿиаратә еихьӡарақәа, шәара шәбаҩхатәра бзиа избо иаадырԥшуа абзиабарала! Ишәзеиӷьасшьоит агәабзиара ӷәӷәа, аманшәалара, ақәҿиара ҿыцқәа!»
