Ҳазҭоу ашықәс анҵәамҭаз, ҳазҭалоу 2023-тәи ашықәс иаҳзаанаго аӡын еилаҳкаарц азы, ҳлыҿцәажәеит аметеоролог, аспециалист хада Диана Ҭраҧшь. Уи излаҳалҳәаз ала, декабр  25 инаркны амшқәа цәгьахоит, аҳаракырақәа рҿы  ақәабаа-сабаа леиуеит. Ҳазҭало ашықәс азы ианвар мза алгамҭа инаркны аҳауа хьшәашәара ҟалоит, бжьаратәла иуҳәозар, хҧа ҧшьба градус аҟынӡа илаҟәуеит аҳауа.

Лара лажәақәа рыла, егьырҭ ашықәсқәа ирҿырҧшны уахәаҧшуазар, макьаназы декабр амза амшқәа ишақәнагоу еиҧш ицоит,  даҽа ҳәаак иҭыҵны ҳәа иҟам. Еиҳарак ианвари феврали мзақәа рзы ахьҭақәа ҟалоит, асы ҳзаанагартә еиҧш. Иазгәаҭатәуп, Аҧсны аҵыхәтәантәи ашықәсқәа рзы еиҳа идуны асы анлеиз 2016 шықәсазы шакәу. Уи аахижьҭеи илеихьеит асы, аха иаразнак ишьҭыҵуан, насгьы еиҳа имаҷны.

Лара излазгәалҭаз ала, макьаназы аҧсабара џьашьатәуп, иаҭаххар иҟанамҵо акгьы ыҟам, мамзар сынтәатәи аӡын егьырҭ  ашықәсқәа раасҭа ихьшәашәа­рахом. Ашықәс ҿыц аламҭалаз ирзеиҕьалшьеит Аҧсны жәлар зегьы аҭынчреи аманшәалареи.

С. Сақаниа