«Ҳгалереиа ҳамҭас иаиуит асахьаҭыхҩы ирҿиара аԥхьатәи аамҭақәа ирыҵаркуа аҭыхымҭақәа руак. Уи ҳколлекциа арбеиоит», – иазгәеиҭеит агалереиа аиҳабы Сурам Сақаниа.
Аилахәыра «Аквафон-GSM» ахаҭарнак Ҭемыр Гәыргәлиа иациҵеит: «Абас еиԥш иҟоу аусмҩаԥгатәқәа ҳтәыла культурала арбеиара иацхраауеит. Ҭабуп ҳәа раҳҳәоит абри ахҭыс иадҳәалоу зегьы».
Уаанӡа агалереиа иарҭахьан асахьаҭыхҩы егьырҭ иусумҭақәа ҩба: «1914 шықәсазы иаԥиҵаз «Ишәҭыкакаҷуа акациа», Фирдоуси иҩымҭала аспектакль «Шахнаме» (1909 ш.) адекорациақәа рескизқәа. Асахьақәа рыҩбагь аахәан Санкт-Петербург коллекционерк иҟны.
XX ашәышықәса алагамҭазы Александр Чачба-Шервашиӡе Петербургтәи аимператортә театрқәа еицырдыруа рсценографцәа дыруаӡәкын. Аус рыциуан А.Бенуа, А.Головин, В.Серов, Н.Рерих, реиԥш иҟаз иналукааша аурыс сахьаҭыхҩцәа.аҳәаанырцәтәи аҟазацәа П.Пикассо, А.Дерен.
Асахьаҭыхҩы иусумҭақәа ҵәахуп Аԥсны Амилаҭтә сахьатә галереиеи, Санкт-Петербург Атеатртә библиотекеи, Москва Бахрушин ихьӡ зху Атеатртә музеии, ахатәы коллекциақәеи рҟны.
