Ареспубликатә ҳәынҭқарратә усҳәарҭа «Аҧснымедиа»
Амашьынаныҟәцаҩ, Липецктәи аобласт аҟны инхауа Киселиов Сергеи Владимир-иԥа, 1982 шықәсазы ииз, хаҭала деимырдеит. Уи мап ацәимкӡеит анаркотикатә маҭәашьар шимаз. Иааидкыланы Киселиов имхын 91 грамм, еихшаны аилаҳәарақәа иргәылаԥсаз. Уи «метадон» акәын.
Хаҭала деимырдеит уи имҩаныза, Москватәи аобласт ақалақь Лиуберцы инхо Дубровина Роза Егор-иԥҳа, 1984 ш. азы ииз. Ларгьы иазхалҵеит зыҭира азин ыҟам амаҭәашьар шлымоу, уи ахәҭакгьы хатәгәаԥхарала ирылҭеит. Иааидкыланы лара илымхын аҭиразы ирхианы илымаз аилаҳәарақәа 70. Урҭ рыкапан иартәеит 78. 260 грамм. Иара убас рҩыџьагьы ирымхын амобилтә ҭелқәеи абанктә хсаалагақәеи маҷымкәа.
Киселиови Дубровинаи рганахьала аоператив-ԥшааратә усмҩаԥгатәқәа раан ишьақәыргылахеит урҭ маӡала ашьҭаҵарҭақәа шыҟарҵоз. Аԥсны ианааи, рҭыԥ ылырхит Аҟәа асасааирҭақәа руак аҟны. Ашьҭаҵарҭақәа ҟарҵон Гәылрыԥшь араион амҩақәа рҿы. Убарҭ ашьҭаҵарҭа ҭыԥқәа рҟны ирбаз анаркотик маҭәашьарқәа идыртәеит 27 грамм инацны.
