Жәларбжьаратәи, апарламентбжьаратәи аимадарақәеи аџьынџьуаа рҟны аимадарақәеи рзы Жәлар Реизара аилак ахантәаҩы ихаҭыԥуаҩ Ахра Ԥачлиа еизаз дрыдныҳәалауа, иаҵишьит Аԥсны шрыхӡыӡаауа Урыстәылаҿы аиҩызаратә, аидгыларатә еимадарақәа.
«Аԥсни Урыстәылеи реизыҟазаашьақәа еснагь ишьақәгылан, иахьагьы иҿиоит наҟ-ааҟ аҳаҭыреиқәҵареи, агәреибагареи, азинеиҟарареи рыла», – иҳәеит иара.
Атәылахьчареи амилаҭтә шәарҭадареи рзы аилак иалоу Асҭамыр Герхелиа иқәгылараҿы хшыҩзышьҭра азыҟаиҵеит ашәарҭадара алыршара аганахьала аусеицура азҵаарақәа.
«Аԥсны зегьрыла иадгылоит Урыстәылатәи Афедерациа имҩаԥнагауа арратә операциа ҷыда. Аԥснытәи хатәгәаԥхарала аибашьцәа Урыстәылатәи асолдаҭцәа инарываргыланы Донбасс еибашьуеит, ашьа карҭәоит», – иҳәеит иара.
Аилатәараҿы дықәгылеит Урыстәылатәи Афедерациа Афедералтә Еизара Аҳәынҭқарратә Дума Ахантәаҩы Виачеслав Володин, иара убас афракциақәа рнапхгаҩцәа, аконференциа иалахәу аделегациақәа рхаҭарнакцәа.
