«Иахьа ҳазкылсит Аҧсны Жәлар Реизараҿы аусеицуразы аформат ҿыц. Ҳнапы аҵаҳҩит Аҳәынҭдумеи Аҧсны Жәлар Реизареи русеицуразы Аиқәышаҳаҭра. Иаҧҵоуп апарламенттә шәага-зага инақәыршәаны азҵаарақәа рыӡбара иазку аусуратә комиссиа. Ҳаицәажәеит мызқәак рыҩнуҵҟала аилатәара шымҩаҧаҳго азы. Уаҟа ҳазхәаҧшуа азҵаатәқәа еицышьақәҳаргылоит. Урҭ Аҧсны атәылауаа реиҧш, Урыстәыла атәылауаагьы ргәы иҵхо проблематә темақәахоит. Ҳара ҳтәала аиҩызара – ари ҩ-ганкы змоу мҩоуп. Аҿиара иаҵанакуа акәзар, уи алыршахоит агәреибагара ашьаҭа мацарала. Агәреибагарада аицәажәара зыҟалом», – иҳәеит Аҳәынҭдума Ахантәаҩы Виачеслав Володин. Уи Аҧсны Жәлар Реизара адепутатцәа зегьы алархәны иарку аформат ала иахьатәи аицәажәара даара хәарҭара аланы иҧхьаӡоит. «Ҳара убри аҩыза ашьаҿа еихаҳгеит иааигәаны ҳаибадырырц азы, ҳаидгыларатә еизыҟазаашьақәа ҳасаб рзухарц азы, ҳаҧхьаҟагьы иҵегьы хырҳарала аусеицура агәаҳәара ҳаурц азы. Атемпқәа шьҭызхуа ҳҳәынҭқаррақәа рхадацәа роуп, убри ахырхарҭала аиҳабыра аус руеит. Апарламентқәа ирыҵаркуа акәзар, акыраамҭа аахыс аицәажәарақәа ҳамамызт, еишьашәалоу аилакқәа рыбжьара аусура шымҩаҧысуазгьы. Апарламентбжьаратә еизыҟазаашьақәа ирыҵаркуа акәзар, урҭ ҵааркын», – иазгәеиҭеит Володин.
Аҳәынҭдума Ахантәаҩы дадгылоит Урыстәылеи Аҧсни рпарламентбжьаратә еимадарақәа иҵегьы хырҳарала рырҿиара, атәылақәа рыҩбагьы, убас ртәылауаагьы ринтересқәа инарықәыршәаны азҵаарақәа рыӡбара аганахьала апарламентқәа ахрархәара. «Аҧсни ҳареи ҳаидызкылауа рацәоуп – азеиҧш ҭоурых, акультура, атрадициақәа, адинхаҵара. Иҳалшоит бызшәак ала ацәажәара, абри аҟнытә, ганкахьала, иаҳзымариоуп аизыҟазаашьақәа рырҿиалара, аха даҽа ганкахьала, ари иҳаднаҵо рацәоуп» – иазгәеиҭеит иара.
Урыстәылеи Аҧсни рекономикатә еизыҟазаашьақәа дрыхькьысуа, Володин хшыҩзышьҭра азыҟаиҵеит атауареиҭарсра шышьҭыҵыз. Уи ҳазну ашықәс азы 41 % рыла еиҳахеит ҵыҧх аасҭа.
«Аҧсны атуризм аганахьала Урыстәыла атәылауаа иаҳа издызыҧхьалауа аҳәынҭқаррақәа хәба рхыҧхьаӡара иалоуп. Аныҟәарақәа урылацәажәозар, Ҭырқәтәыла ашьҭахь Аҧсны аҩбатәи аҭыҧ ааннакылоит. Ари ауаа иалырхуа амҩа ауп. Ирҭахуп Аҧсныҟа иааларц, Аҧсны атәылауаа ракәзар – Урыстәылаҟа ицаларц. Абри иҳаднаҵо рацәоуп, абри аҟнытә, даара акырӡа аҵанакуеит асоциал-економикатә усхк аганахьала азакәанҧҵарақәа реиҿыбаара, аҳазалхратә политикеи, ашәахтә закәанҧҵареи, асоциалтә политикеи уҳәа рганахьала азҵаарақәа рҭыҧ рықәҵара. Абраҟагьы апарламентқәа рнапы зларкша рацәоуп. Иҟоуп даҽа зҵаарақәакгьы, урҭ ҳрылацәажәеит Аҧсны Жәлар Реизара адепутатцәеи ҳареи ҳаиҧылараҿы», – иҳәеит Володин. Уи ҩаҧхьа иаҵишьит абри аҩыза аицәажәара раҧхьаӡакәны ишрымаз. «Даара гәаартыла ҳаицәажәеит, аӡәи-аӡәи еиҕьны ҳаилибакаауа ҳалагеит, ҳагьеибадырит. Лаша Нугзар-иҧа ҳааиҧхьар, гәахәарыла еиҭа ҳаауеит», – иҳәеит Володин. Уи иара убас Аҧсны Жәлар Реизара адепутатцәа неиҧхьоит Аҳәынҭдумаҿы жәларбжьаратәи аконференциахь, афракциатә усуреи апарламентҩнуҵҟатәи адемократиа арҿиареи ирызкхо. «Абри аицәажәара аинтерес цәырнагар, Аҧсны Жәлар Реизараҿы еиуеиҧшым афракциақәа хаҭарнакра рзызуа адепутатцәа зегьы наҳаҧхьоит», – иҳәеит иара. Аҳәынҭдума Ахантәаҩы Жәлар Реизараҿ имҩаҧысыз аицәажәара алҵшәа бзиа аиуит ҳәа азиҳәеит. «Уажәнатә аихшьалақәа ҟауҵар ауеит, абыржәы Аҧсны Ахадеи аиҳабыра рхантәаҩи рҟны акырӡа зҵазкуа аицәажәара шҳауагьы. Сгәыҕуеит, нас уи атәгьы ҳалацәажәап ҳәа», – иқәгылара хиркәшеит Володин.
