Иазгәаҭатәуп Ольга Дубинскаиа иаҧылҵаз афильм «Страсти по Владиславу» азы акинофестиваль «Страна души» аҟны Гран-при» анашьан.

Ацәыргақәҵа аиҿкаараҿ ацхыраара ду ҟарҵеит Ольга лыҧшәма (уажәы Аҧсны дааны дыҟоуп) Дмитри Минчионок, Светлана Џьергьениа, Алхас Аргәын, Мадина Арӡынба, Кьасоу Ҳагба.

Сара хаҭала исгәалашәоит 11 шықәса раҧхьа лара абри азал аҿы ацәыргақәҵа еиҿкааны, аинтервиу анрылҭоз. Уи ашьҭахь ҳажәлар дук хара имгакәа дыдраҵас ирзыҟалеит, иаалырҟьан зыҧсҭазаара ахьҿахҵәаз Ольга Дубинскаиа. Лара ҳажәлар ирзынлыжьит абаҟа, ҧсра зқәым ҳҧыза ду Владислав изку афотоҭыхымҭақәа.

«Аҧсны аблокада ианҭакыз Ольга Дубинскаиа 60 инарзынаҧшуа Аҧсны иазкыз астатиақәа Урыстәыла илкьыҧхьит. Еиҿылкаауан Аҧсуа рҿиаратә коллективқәа рзы агастрольқәа, Аҧсуа драматә театр, ахортә капелла, Урыстәыла, Аҳәаанырцә агастрольқәа рзеиҿылкааит», – лҳәеит Ельвира Арсалиа лықәгылараҿы.

Ацәыргақәҵа аиҿкааҩцәа ируаӡәку Кьасоу Ҳагба дазааҭгылеит: «Ольга Дубинскаиа илҭынхеит 2-нызқь инарзынаҧшуа лфотосахьақәа, урҭ зегьы Аҧсны ауп иахьҭылхыз.

Ацәыргақәҵа абаразы иаҭааит аҳәынҭқарратәи ауаажәларратәи усзуҩцәа, Ольга Дубинскаиа лҩызцәа, лара хаҭала дзықәшәахьаз, лдунеи ҭбаа, лыуаҩра, лбаҩхатәра аҧхарра знырхьаз. Аҧсны иазку Ольга Дубинскаиа лфотоҭыхымҭақәа збар зҭаху уи аҩыза алшара рымоуп октиабр 28 рзынӡа ацәыргақәҵатә зал аҿы.

Наира Сабекиа