Адныҳәалараҟны иазгәаҭоуп:

«Ҳаҭыр зқәу Алеко Алықьса-иҧа!

Ҳаҭыр зқәу аҩызцәа! Ишәыдаҳныҳәалоит аҵак ду змоу аиубилеи – Аҧснытәи Аҳәынҭқарратә университет 90-шықәса ахыҵра арыцхә.

Ахә ашьара уадаҩуп Аҧсны Аҳәынҭқарра аҭоурых аҟны ауниверситет инанагӡо ароль, ҳауаажәлар рахьтә аӡәырҩы рыҧсҭазаара иара иузаҟәымҭхо иадҳәалоуп. Арҭ ашықәсқәа зегьы ААУ аколлектив, аҵараиурҭа ашьақәгылареи аҿиареи амҩа ду ианысит.

Аҧсны Аџьынџьтәылатә еибашьра ашықәсқәа раан ауниверситет арҵаҩцәеи астудентцәеи Аҧсадгьыл ахьчаразы игылан – 94-ҩык уи рхы ақәырҵеит. Рыхьӡ кашәара ақәымзааит!

Аҧснытәи аҳәынҭқарратә университет апрофессортә-рҵаҩратә еилазаара есқьынгьы ишьақәгылан аҟыбаҩ бзиа змаз, ааҧсара ззымдыруаз Аҧсадгьыл апатриотцәа рыла. Иахьагьы Шәара шәколлектив еиднакылоит аҿар разыҟаҵаразы иреиҕьу атрадициақәа ирықәныҟәо, аҵараиурҭа ашьапы зкыз шықәсырацәала иныҟәыргоз аидеиақәа рынагӡара иацызҵо аусзуҩцәа. Шәара ахаангьы ҳтәыла ауаажәларра-политикатә ҧсҭазаара агәҭа шәгылан, жәлар рынхамҩа аҭахрақәа ҳасаб рзуны, арҵаҩратә, аҭҵаарадырратә усураҟны ҳаамҭазтәи ахырхарҭақәеи азнеишьақәеи шәрықәныҟәоит. Аҳәынҭқарра аргылара иацхраауа акадртә лшарақәа хаҭабзиарала разыҟаҵараан – шәара шәзы апрофессионализм ихадоу шәага-загоуп.

Аҧснытәи аҳәынҭқарратә университет аҟны иазыҟаҵоуп ареспублика аҵара, аҭҵаарадырра, аекономика, акультура, аспорт рыҿиараҿы злагаламҭа дуу аспециалистцәа рабиҧарақәа.

Агәра аагоит абас, акыр шықәсала ҳуниверситет ишааӡало аҧышәа змоу, зхыҧша ыҟоу арҵаҩцәа рҟнытә ироуа адырра шьаҭас иҟаҵаны адырра ҿыцқәа риура, зинтеллект аизырҳара иашьҭоу астудентцәа рабиҧара ҿыцқәа.

Акыр иаҧсоу аҩызцәа! Ҳаҧхьаҟа аус дуӡӡа шьҭоуп, дарбанзаалак Аҧсны атәылауаҩ иеиҧш, аҳәынҭқарра зегьы азгьы аҵак ду змоу алҵшәақәа риуразы.

Аҧсны Жәлар Реизара – Апарламент ахьӡала ишәзеиҕьасшьоит агәабзиара, агәамч, шәнапы злаку аусқәа рҟны аихьӡарақәа!".

Аҧсны Аҧыза-министр Алеқсандр Анқәаб Аҧснытәи аҳәынҭқарратә университет аректори, апрофессортә-рҵаҩратә еилазаареи, астудентцәеи аҵараиурҭа аиубилеитә рыцхә рыдиныҳәалеит. Адныҳәалараҿы ахәҭакахьала иаҳәоит:

«Ҳаҭыр зқәу аҩызцәа! Ишәыдысныҳәалоит атәыла иреиҳау аҵараиура ацентр хада 90-шықәса ахыҵра!

Раҧхьатәи иреиҳау аҧсуа ҵараиурҭа ибеиоу аҭоурых, иналукааша аҵарауаа, зеиҕьаҟам арҵаҩцәа, аҟыбаҩ ду злоу астудентцәеи аушьҭымҭацәеи рабиҧарақәа рыла ишьақәыргылаз иҕәҕәоу атрадициақәа амоуп. Урҭ амилаҭтә кадрқәа рычаҧарҭа иааиҧмырҟьаӡакәа ирымадоуп, насгьы ҳҭоурых аҿы имаҷымкәа иҟаз еиуеиҧшым ауадаҩрақәа раангьы иҳараку аидеиақәа гәык-ҧсыкала рзыҟазаара ауп иахьа ҳара зегьы ҳзызгәдуу Аҧснытәи аҳәынҭқарратә университет ахьӡ-аҧшеи аҳаҭыри шьақәзыргылаз.

Аҟәатәи арҵаҩратә институт аҟнытә Аҧснытәи ауниверситет ҳәа ишьақәгылаз ароль ҷыда ааннакылон: атәыла иреиҳау аҵараиурҭа аҭыӡқәа рыҟны ахы цәырнагон, анаҩс аҿиарамҩа ианылон, адгылара ҕәҕәагьы аиуан аҧсуа жәлар ргәыҕра змадаз амилаҭ-хақәиҭратә қәҧара иабзоурахаз ахақәиҭреи ахьыҧшымреи риура. Уи аҵыхәтәан аҧсуа ҳәынҭқарра аиҭашьақәыргылара иашьаҭаны иҟалеит.

Ҳара ҳҳәынҭқарра ҳамазааразы Аҧсны жәлар Рџьынџьтәылатә еибашьраан рхы иамеигӡа изыхьчоз иреиуан Аҧснытәи аҳәынҭқарратә университет аусзуҩцәеи астудентцәеи. Аӡәырҩы иахьатәи ҳамши ҳаҧсҭазаареи ҟаларц азы рхы ақәырҵеит. Арҵаҩцәа-аветеранцәа руниверситет гәакьа ахь ихынҳәны иахьа уажәраанӡа аҭҵаарадырра амаҵ азыруеит, еиҵагыло аспециалистцәа ҿыцқәа рабиҧарақәа рааӡоит.

Иахьа ауниверситет аҿаҧхьа иҟоуп аперспектива дуӡӡа, уи активла иҿиоит, аинновациатә ҵарадырратә программақәа аланагалоит, аҭҵаарадырратә проектқәа нанагӡоит. Аҧхьагылара змоу урыстәылатәи аҭҵаарадырратә центрқәа алархәны инарыгӡо апроектқәагьы уахь иналаҵаны, рааӡамҭацәа ихымҧадатәиу адыррақәа рырҭоит.

Ҳара ҳҵарауаҩ ду, Аҧснытәи аҳәынҭқарратә университет аректор Алеко Алықьса-иҧа Гәарамиеи иара ивагыланы аус зуа иколлегацәеи есымша иҳараку ахықәкқәеи ахыдҵақәеи раҧхьа идыргылоит, урҭ қәҿиаралагьы инарыгӡоит.

Ҳаҭыр зқәу аҩызцәа, ишәзеиҕьасшьоит азанааҭтә қәҿиарақәа, аихьӡара ҿыцқәа, агәабзиареи агәамчи, аизҳазыҕьареи!

Уадныҳәалаз аиубилеи, иҳазгәакьоу ҳуниверситет!»