«Амшын аҧшаҳәаҿы анеиааира»зыхьӡыз афестиваль ааиртит уи амҩаҧгаҩ апоет, ажурналист Алхас Чхамалиа. Анаҩс ажәа ииҭеит Амилаҭтә библиотека аиҳабы Борис Ҷолариа.
«Бзиала шәаабеит ажәбатәи Жәларбжьаратәи Арт-фестиваль» иалахәу зегьы, ҳҩызцәа, ҳколлегацәа, асасцәа, аҿар, ашколхәыҷқәа! Сынтәатәи афестиваль Иван Гьаргь-иҧа Папасқьыр диижьҭеи 120 шықәса аҵра иазаҳкит. Амилаҭтә литератураҿы злагала рацәоу апрозаик, ароманист ҳбиблиотека ихьӡ ахьаху ҳара ҳзы игәадуроуп. Агәыҕра ҳамоуп аныҳәа даара аинтерес аҵаны имҩаҧысп, агәалаҟара бзиагьы шәзыннажьып ҳәа, избан акәзар, уи амҽхак есааира аҽарҭбаауеит. Мҩамш, ажәбатәи Жәларбжьаратәи Арт-фестиваль!», – иҳәеит уи иқәгылараан еиқәшәаз дрыдныҳәалауа.
Адныҳәаларақәа рыла иқәгылеит иара убас Москва инхо аҧсуа шәҟәыҩҩы, ауаажәларратә усзуҩы, Ф.Искандер ихьӡ зху Жәларбжьаратәи алитературатә премиа занашьоу Владимир Делба, Ҟарачы-Черқьестәыла жәлар рышәҟәыҩҩы, аҵарауаҩ Олег Еҭлухов, Аҧсуа-абаза жәлар Рконгресс ахаҭарнак, аҵарауаҩ, ауаажәларратә усзуҩы Беслан Кобахиа, Краснодар, Саха-Иакутиа уҳәа рхаҭарнакцәа.
Афестиваль апрограмма шьақәгылан алитературеи абиблиотекеи; лаҧшылатәи аҟазара; амузеи аҭыҧ; акәашара аҭыҧ; амода; амилаҭтә ҟазара, амилаҭтә хеилакқәа ргәыҧ, аспорт, ахәыҷқәа рҭыҧ уҳәа еиуеиҧшым акәакьқәа рыла.
Афестиваль иаҭаауаз урҭ аҭыҧқәа ирҭаауан, ирбоз-ираҳауаз, еилыркаауаз рацәан, еиҳаракгьы аҧсшьаҩцәа гәахәарыла ирыдыркылеит.
Даараӡа алахҿыхра ацны имҩаҧысит иаагозар алитературеи абиблиотекеи рҭыҧ аҟны еиҿкааз. Ашколхәыҷқәа И.Папасқьыр иҧсҭазаареи ирҿиаратә мҩеи рҟнытә ацыҧҵәахақәа ргәаладыршәон, иҩымҭақәа рҟнытә рцыҧҵәахақәа ирыҧхьон, исахьаркны ирыҧхьон иара убас аҧсуа поетцәа ражәеинраалақәа. Иубартә иҟан аҵаҩцәа алитература ишазҿлымҳау.
Абасала сентиабр 25 рзыАмилаҭтә библиотекаҿы имҩаҧысыз ажәбатәи Жәларбжьаратәи аҿартә Арт-фестиваль «Амшын аҧшаҳәаҿы анеиааира» иалахәыз зегьы агәҭахәыцра бзиақәа рзыннажьит.
Амилаҭтә библиотека анапхгареи аусзуҩцәа иҭабуп ҳәа рарҳәеит афестиваль амҩаҧгаразы ирхаҵгылаз ацхыраара рызҭаз Аҧсны Акультура Аминистрра аҧхьа инаргыланы, Аҟәа ақалақьи ҳтәыла араионқәеи рхадарақәеи ркультура аҟәшақәеи, уҳәа.
В.Абыгба
