Аха аԥсуаа рыҷкәынцәа ихьаҵуаз ракәмызт. Аӷа џьаԥҳанылеи уааԥсыралеи имч акыр ишеиҳазгьы, ҳаҷкәынцәа гәымшәақәа рхы-рыԥсы иамеигӡа, гәшәарак ҳәа ҟамҵаӡакәа, напышьашәалаҵәҟьа аӷа иҿагылт. 413 мши-ҵхи ицоз аибашьра аҟны иҭахеит зықьҩыла ҳҵеицәа хазынақәа. Иҭахеит аԥсуа жәлар ацхыраара анырҭахха иарӷьажәҩаны ирывагылаз хатәгәаԥхарала Аԥсныҟа еибашьра иааз ҳашьцәа.

Иахьа иҵит 32  шықәса Аԥсны Аџьынџьтәылатә еибашьра (1992-1993шш.) иалагеижьҭеи. Убри инамаданы Аҟәа Ахьӡ-Аԥша апарк аҟны, ашәҭқәа шьҭарҵарц, иҭахаз ргәаладыршәарц уахь инеит: Аԥсны Ахада Аслан Бжьаниа, Ахада ихаҭыԥуаҩ Бадра Гәынба, Аҳәынҭқарра Ахада Иусбарҭа анапхгара, адепутатцәа, Аԥсны иҟоу Урыстәыла ацҳаражәҳәаҩ Михаил Шургалин, Аԥсны иҟоу Аахыҵ-Уаԥстәыла ацҳаражәҳәаҩ Олег Боциев, Аԥсны атәылахьчара  аусбарҭа аусзуҩцәа, аветеранцәа, аибашьраҿ иҭахаз ранацәа, ауаажәларратә усзуҩцәа.