Аслан Бжьаниа Рашид Темрезов ҭабуп ҳәа иеиҳәеит Ареспублика еиҿыркааижьҭеи 100 шықәса аҵра аныҳәахь ааҧхьара ахьииҭаз азы. "Шәреспублика ҧшӡа ашҟа ҳааит ҳашьцәа рҧыларазы. Ҳара – жәларыкуп, абасеиҧш иҟоу аныҳәа аҽны абраҟа, шәара шәыгәҭа аҟазаара ҳаҭыр дууп сара сзы", – иаҵишьит Ахада.
"Ареспублика ҕәҕәала иҿиоит, уаҩы деигәырҕьоит уи. Шәареи шәҩызцәеи ишәылшеит абраҟа амилаҭқәа рыбжьара аҭынчра алыршара. Шәареи Ҟарачы-Черқьестәыла милаҭ рацәала еилоу ажәлари ишәыдысныҳәалоит шәреспублика 100 шықәса ахыҵра. Агәахәара снаҭоит иахьа шәыгәҭа сахьыҟоу. Аҧсынгьы шәара ишәыҧсадгьылуп, Шәара, ҳаҭыр зқәу Рашид Бориспи-иҧа, ҳара ҳҟны шәбара еснагь ҳаигәырҕьоит", – иҳәеит Аслан Бжьаниа. Аҧсны Ахадеи Ҟарачы-Черқьестәи Ареспублика Ахадеи аусеицура хра злоу азҵаарақәа ирылацәажәеит.
