Ари ашкол ашәхымс раҧхьаӡа акәны ихыҵны, адыррақәа рдунеи ҧшӡа, рдунеи џьашьахә ахь зшьаҿа еихызгауа рзы мшы ҷыдоуп. Ашкол аҟны аиҧш, иреиҳау аҵараиурҭаҿгьы аҵара аамҭа – ари аҧсҭазаараҿы даара акырӡа зҵазкуа хҭысуп. Абри аамҭазы иааҧшуеит абаҩхатәрақәа, шәара, акыр иаҧсоу аҵаҩцәа, шәаҧхьаҟа шәыҧсҭазаара здышәҳәалауа азанааҭқәа анапаҿы раагаразы ашьаҭақәа аҧышәҵоит. Абри амҩаҿы шәара еснагь ишәывагылоуп шәҭаацәа, шәырҵаҩцәа», – иазгәаҭоуп адныҳәалараҿы. Аҳәынҭқарра Ахада аҵаҩцәа, арҵаҩцәа, аҭаацәа ирзеиҕьаишьеит ҳазҭалаз аҵарашықәс аан рҿаҧхьа иқәдыргылаз ауснагӡақәа зегьы ралыршара, анасыҧ, агәырҕьара, ақәҿиарақәа.

Аҧсны Жәлар Реизара Аиҳабы Лаша Ашәба ашколхәыҷқәа, астудентцәа, аҭаацәа, арҵаҩцәа ирыдиныҳәалеит аҵарашықәс ҿыц. Уаҟа иазгәаҭоуп: «Акыр иаҧсоу аҩызцәа! Аҧсны жәлар Реизара ишәыдырныҳәалоит аҵарашықәс ҿыц алагара! Шәарҭ шәахьтә дарбанзаалак Сентиабр акы даҧылоит ацәанырра ҷыдақәа иманы. Ари амш ҳаҧсҭазаараҿы акырӡа зҵазкуа аамҭоуп. Ҳара ҳуснагӡатә хада акәны иҟоуп аҵареи, аспорти, аҭҵаарадырреи, аҟазареи рҟны дарбанзаалак илшарақәа неигӡалартә аиҧш еиҵагыло абиҧара аҭагылазаашьақәа рзаҧҵара. Зегьы ишәзеиҕьаҳшьоит агәалаҟазаара бзиа, ақәҿиарақәа».