Лара иаҳзеиҭалҳәеит, ари аҩыза аметод раҧхьаӡакәны 2018 шықәсазы Аҧснынтә 4-5-ҩык арҵаҩцәа акурсқәа ирхысны  ашколқәа рҟны аҵаратә процесс аҿы рхы иадырхәар шырҭаххаз, аха  еиуеиҧшым амзызқәа ирыхҟьаны рҽазышәарақәа лҵшәадахеит. Иҳаҩсыз ашықәс азы Илонеи уи лҩыза, алицеи-интернат аҿы  аҭоурыхтә маҭәар рызҭо  Русудан Хышбеи ирыӡбеит акурсқәа ирхысырц, егьрықәҿиеит. Илона лажәақәа рыла,30 вариант ахьыҟаз,лурокқәа рҿы 10 вариантк лхы иалырхәо далагеит. Аҧхьаӡа аҵаҩцәа ирцәыцәгьан, аха нас иашьцылеит, аинтерес ркит. Уи авариант еихшоуп ҩ-хәҭакны: актәи ахәҭаҿы хшыҩла ахәыцреи азхәыцреи аҭаххоит, анаҩс блала иибо шидикыло, иблала ишибо еиҭеиҳәоит. Иаҳҳәап сахьак кыдзар, иара дахәаҧшны дхәыцны дахцәажәароуп, убри ала ихшыҩ аус аируеит, уи аҵаратә процесс иацхраауеит. Авариантқәа зегьы рхатә ҷыдарақәа рымоуп, рхатәы хьыӡқәа рымоуп.

 Иаҳҳәап иҟоуп вариантк, хьӡыс измоу «Сара избоит, сара сазхәыцуеит», уи авариант рхы архәара аҵаҩцәа даара бзиа ирбоит. Иҟоуп убас еиҧш авариант, аҳасабтә иаҩызоу, аха уи аҟны аҵаҩы иоуп хадара злоу атекст аус шадиуло, аҧхьа даҧхьоит, нас азҵаарақәа рҭак ҟаиҵоит, анаҩс иану аҭакқәа еиҿирҧшуеит, нас ихы анализ азиуеит иашаны аҭак ахьынӡаҟаиҵаз. Иара убас ирырҭоит атекстқәа рҟынтәи адҵа х-ҳәоук ылырҩаарц. Аха урҭ рҟынтәи ҩба иашазароуп, акы иашамзароуп.

Убри ала аҵаҩы ихшыҩ аус адиулартә еиҧш аҭагылазаашьа иоуеит. Арҵаҩы лажәақәа рыла, ари аҩыза аметодика ахәыҷқәа иргәаԥханы ирыдыркылеит. Гәахәарыла аус руеит, аинтерес аадырԥшуеит. Ас еиҧш иҟоу аметод алицеи-интернат аҿы адагьы, рхы иадырхәоит иаҧсыуам ашколқәа рҟны.

 Сингапуртәи аметодқәа рыла аҵаҩцәа аҵара дырҵара далагеижьҭеи шықәсык ҵуеит. Иазгәалҭеит  мызкы ала ишышьҭыркаахьаз. Агәра лгоит – егьырҭ арҵаҩцәагьы  еиуеиҧшым амаҭәарқәа рҿы ари аметод ала аҵара дырҵара иалагар, аҵаҩцәа аҵара иаднаҧхьалоит, агәыбылра днаркуеит. 

Стелла Сақаниа