Уи зегьы зыбзоуроу амобилтә еилазаара «А-мобаил» еиҿызкаази, уи аусзуаҩцәеи роуп. Аха уи аҭоурых сагәылалаанӡа,ишәсырдырырц сҭахәуп сынтәа урҭ ишырхыҵыз 17 шықәса.

Иҳаҩсыз амчыбжь азы агәырҕьаратә ныҳәа азгәарҭон. Уи иалагаанӡа «А-мобаил» аусзуҩцәеи урҭ ргәырҕьара рыцеиҩызшарц инеиз рысасцәеи аныҳәатә гәалаҟазаара рхыҿсахьақәа ирнубаалон.

Дарбанызаалак ауаҩы иус ҭакҧхықәрала даназнеиуа, инапы злакәу аус аҿиара аиоуеит. Убас амобилтә еимадара ҧхьаҟа агара алзыршаз «А-мобаил» аусзуҩцәа роуп. Жәибжь шықәса раҧхьа еиҿкааз  аус абзоурала иахьа «А-мобаил» еиднакылоит 400-ҩык инарзынаҧшуа азҟазацәа, урҭ зегьы ашәахтә зшәо роуп.

«А-мобаил» аофисқәа Аҧсны араионқәа зегьы рҟны иҟоуп. Иахьатәи ҳаамҭазы ари аимадара рхы иадырхәоит 100 нызқь- ҩык инарзынаҧшуа абонентцәа абарҭ акаҭақәа рыла 2G 3G 4G. Есымшааира атарифтә план ҿыцқәа аларгалоит аимадаразы,мамзаргьы аинтернет ахархәаразы.

Амобилтә еимадара «А-мобаил» еснагь ахы аланархәуеит еиуеиҧшым апроектқәа рҿы, асоциалтә ҟазшьа змоу, мамзаргьы агәыҳалалратә акциақәа рҿы, амилаҭтә ҟазшьа змоу апроектқәа уҳәа убас ирацәаны.

Агәырҕьаратә концерт алагеит Аҧсуа гимн арҳәарала. Анаҩс адныҳәаларатә ажәахәқәа ҟарҵеит Борис Барцыц, амобилтә еимадара аиҳабы ихаҭыҧуаҩ Арсоу Хашба, «А-мобаил» аҧҵаҩы Важа Чачба. Анаҩс дыргәаладыршәеит аимадара аҧҵаҩыс иҟаз, зус даараӡа бзиа избоз, уи гәцаракны иазнеиуаз, даараӡа аџьабаа збахьаз, рҩыза бзиа, иахьа зыдунеи зыҧсаххьоу Евгени Иаков-иҧа Палант. Уи иусуратә процесқәа алаҵаны идырбан афильм, ашьҭахь минуҭктәи аҿымҭрала дыргәаладыршәеит рҩыза бзиа.

Анаҩс асценахь иааҧхьан 17-ҩык «А-мобаил» аусзуҩцәа. Урҭ рнапаҿы ирыҭан аҳаҭыртә грамотақәеи, аҳамҭақәеи, ашәҭ шьыҵәрақәеи. Аҳамҭақәа зауз иреиуан акыр шықәса аимадара иазааҧсахьоу, иахьа уажә­раанӡагьы аус адызуло: Даур Аҳәба, Беслан Багаҧшь, Вера Гәарамиа, Владимир Гончар, Иарослав Гончар, Адгәыр Гыруаҧшь, Наала Козмаа, Александр Мерџьаниан, Владимир Нехаи, Нугзар Пачулиа, Илона Смыр, Мираб Тәанба,Лев Халиф, Алексеи Ҵәыџьба, Лиана Ҷанба, Валери Шилин, Гәында Иакуб-оглы.

Анаҩс аныҳәа харҭәаан еиуеиҧшым аицлабрақәеи, ашәаҳәареи, акәашареи рыла.

С.Сақаниа