«Абҵарамза 21, 2023 шықәса, 21 сааҭ инарзынаԥшуа, Афон Ҿыц ақалақь аҿы, гәыԥҩык ауаа Аԥсны аҳәынҭқарратә дачақәа Русбарҭа иатәу аҳәынҭқарратә дача аихабетонтә хкаара рбганы аҵакыра аҩныҵҟа иҭалеит. Иара убри ала аҳәынҭқарратә мазара азарал ду аиуит», - иагәаҭоуп аҳәамҭаҿы.
Акциа иалахәыз изларҳәаз ала, аихабетонтә хкаара арбгара аҳәынҭқарратә дача аҵакыра аҭиразы аҽазыҟаҵарақәа мҩаԥысуеит ҳәа ацәажәарақәа ирыхҟьеит. Арҭ ацәажәарақәа акала ишьақәырӷәӷәам ҳәа иазгәаҳҭоит. Акциа иалахәыз иара убас Афон Ҿыц аҿиара аҭахрақәа рзы, ахәҭакахьала, асоциалтә инфраструктура аобиектқәа рыргыларазы адгьыл азоужьра хымԥадатәны иҟоуп ҳәа аҳәамҭа ҟарҵеит.
Аԥсны азакәанԥҵара инақәыршәаны, Аҳәынҭқарра Ахада ирезиденциеи аҳәынҭқарратә дачақәеи рганахьала ахатәтәреи амхреи залыршахом. Убри аҟнытә, Аԥсны аҳәынҭқарратә дачақәа Русбарҭа аҳәынҭқарратә дача аҭиразы изеиԥшразаалак аҭагылазаашьеи алшареи ыҟаӡам.
Аԥсны азинмчы змоу аҳәынҭқарратә усбарҭақәа иҟоу азакәанԥҵара инақәыршәаны иахәҭоу агәаҭарақәа рымҩаԥгара иалагахьеит, азакәанԥҵара еилазгаз ауаа хымԥада азакәан инақәыршәаны аҭакԥхықәра рыдҵахоит».
