Елкан Гәазаа Урыстәыла аԥхьахәгараҿы иигаз аиааира изикит зыԥсҭазаара иалҵыз иабжьгаҩ, иара изы иҿырԥшыганы иҟаз, аштангашьҭыхҩы, жәларбжьаратәи акласс аспорт азҟаза, Асовет Еидгыла, иара убасгьы адунеи арекордсмен, атлетика хьанҭазы ачемпион, Леон иорден занашьоу, «Ахьӡ-Аԥша» III аҩаӡара аорден занашьоу  Руслан Расим-иԥа Ҭаркьыл. 

 Аицлабрақәа мҩаԥысуеит Ареспублика Адыгеиа Маиҟәаԥ ақалақь аҿы. Уи иалахәуп Урыстәыла 45 регион рҟынтәи 450-ҩык аспортсменцәа. Елҟан Гәазаа зыкапантә категориа 67 килограмм рҟынӡа иҟоу рыбжьара Ҭаҭарсҭан ахьӡала дықәгылон.

 Елҟан Гәазаа – Урыстәыла ачемпион, Урыстәыла Ахраҿа агара зҽаԥсазтәыз, Урыстәыла Аԥхьахәгараҿы аиааира згахьоу, Урыстәыла аԥхьахәгара араӡнытә медал аиура зҽаԥсазтәыз, Урыстәыла иреиӷьу аспортсменцәа Рспартакиадаҿы аџьазтә аԥхьахә згахьоу, Урыстәыла арекордсмен, аспорт азҟаза иоуп.

Аԥсуа спортсмен Елҟан Гәазаа Аолимпиатә резерв иатәу Казантәи аҵараиурҭаҿы аҵара иҵоит, Марат Мадиаров инапхгарала иҽазыҟаиҵоит. Уаанӡа аспортсмен Д.И. Чагәаа ихьӡ зху Калдахәаратәи ашкол-интернат атлетика хьанҭа асекциаҿы иҽазыҟаиҵон Асовет Еидгыла аспорт азҟаза, Аԥсны зҽаԥсазтәыз арҵаҩы Иасон Кьахьба инапхгарала.