Урҭ ихьӡырҳәагоу ҳажәлар рҵеицәа дыруаӡәкын 74 шықәса дшырҭагылаз ааигәа зыԥсҭазаара иалҵыз аштангашьҭыхразы Жәларбжьаратәи акласс аспорт азҟаза, Асовет Еидгылеи адунеизегьи ррекордсмен, атлетика хьанҭазы ачемпион, Аԥсны жәлар Рџьынџьтәылатәи еибашьра аветеран, «Леон иорден», «Ахьӡ-Аԥша» аорден III аҩаӡара занашьоу Руслан Расим-иԥа Ҭаркьыл.

«Илегендахаз, хьӡи-ԥшеи згымыз ҳаспортсменцәа рыԥсҭазаара ралҵра гәыхь дууп. Руслан Расим-иԥа дыздыруаз зегьы рзы дҿырԥшыганы даанхоит. Иара ииааирақәа рҿырԥшала иааӡан аԥсуа ҿар рабиԥарақәа акыр. Аԥсны аҿари аспорти русқәа рзы аҳәынҭқарратә Еилакы гәалсра дула ирыдышшылоит Руслан Расим-иԥа Ҭаркьыл иуацәеи, иҭынхацәеи, иҩызцәеи.  Ари даара цәыӡ дууп Аԥсны еиԥш адунеи  аспорттә еилазаара зегьы азы», - ҳәа азгәаҭоуп аҳәынҭқарратә Еилакы иҟанаҵо адышшылараҿы.

Адунеи арекордсмен Руслан Расим-иԥа Ҭаркьыл диит 1950 шықәса лаҵара 5 рзы Гәдоуҭа араион Дәрыԥшь ақыҭан. 1972 шықәсазы далгеит Аҟәатәи аҳәынҭқарратә арҵаҩратә Институт. Аҟәа ақалақь аҿы атлетика хьанҭала иҽазыҟаиҵо далагеит. Атлетика лас азы – аихампыл аршәразы Аԥсны арекордсмени ачемпиони ҳәа ахьӡ ихҵахеит. 1969 шықәсазы Руслан Ҭаркьыл атлетика хьанҭа азы арԥарцәа рыбжьара атәыла дачемпионхеит. 1970 шықәсазы –  ақәыԥшцәа рыбжьара Асовет Еидгыла ачемпионхара иҽаԥсеитәит.

1971 шықәсазы Болгариа имҩаԥысуаз жәларбжьаратәи атурнир аҿы иара зыкапантә категориа 90 кьыла иҟоу рыбжьара адунеи арекордсмен ҳәа ахьӡ аиура иҽаԥсеитәит. 

1972 шықәсазы Қырҭтәыла имҩаԥысуаз Аспартакиадаҿы иара агәҭасра, аҵҟьара, аклассикатә  ахыхкеицлабра рзы адунеи арекордқәа хԥа шьақәиргылеит.

Убасгьы аҳәаанырцәтәи аҳәынҭқаррақәа Германиа, Монголиа, Куба, Болгариа имҩаԥысуаз жәларбжьаратәи атурнирқәа рҿы изныкымкәа аиааирақәа игахьан (1972-1974 шш.), (ақ. Челиабинск, 1975 ш.), Асовет Еидгыла ажәларқәа  VI Рспартакиада (ақ. Вильниус, 1975 ш.). Асовет Еидгыла Ахраҿа Араӡнытә даԥхьахәгаҩын.

 1976  шықәсазы атлетика лас азы Ареспубликатә Ахәыҷтәы-қәыԥштә спорттә школ  адиректорс дҟалеит,  аамҭак ала азыҟаҵаратә усурагьы инапы алакын.

Руслан Расим-иԥа дызлаз иуаажәлар рҟны ианакәызаалак ҳаҭыр ду иқәын. Уи иҟазшьа бзиақәа ируакын ауаҩы изааигәахара, иеилкаара, иашәа ҟәыӷеи илахҿыхреи дарбанызаалак дизхьадмырԥшырц залшомызт.

Руслан Ҭаркьыл ажәа мҳәаӡакәа ус унаихәаԥшыргьы, хашҭрак иқәымкәа угәаҿы дынхон ахааназ, убас уатәыртәуан адауаԥшь иблақәа, инырҳара, иҭеиҭыԥш, уи иацназгоз игәаҭа.

Ухараҭ бзиаз Абраскьыл ихылҵшьҭра.