Иван Сафар-иԥа акыр шықәса инеиԥынкыланы Аԥсны жәлар рыкәашареи рышәаҳәареи Рҳәынҭқарратә ансамбль адирижиорс дыҟан, ансамбль «Риҵа» асахьаркыратә напхгаҩын. С.Ҷанба ихьӡ зху Аԥсуа ҳәынҭқарратә драматә театр аҟны ансамбль «Уарада» еиҿикааит. 1992-1993 ш.ш. Аԥсны жәлар Рџьынџьтәылатә еибашьраан Гәымсҭатәи афронт аҿы акультуреи аҟазареи русзуҩцәа рвзвод акомандаҟаҵаҩыс дыҟан.

Иван Сафар-иԥа Аԥсны амузыка-фрльклортәи аетнографиатәи аматериалқәа рыҭҵаара, реиқәырхара, рырҿиара аус илагала ду алоуп. Уи традициала ишьақәгылахьоу ажанрқәа рыла ашәақәа ҷыдала хшыҩзышьҭра риҭон: аҭоурых-фырхаҵаратә, аџьатә, ачаратә, ашәарыцаратә. Еизигаз аматериалқәа рыла аԥсуа жәлар рашәақәа реизга ҭыҵхьеит.

Иван Шамба иеиԥш иҟоу ауаҩы ихәҭоу ажәа аҳәара даараӡа иуадаҩуп… Уи иԥсҭазаара ҳажәлар ргәырӷьара, рхьаа, рыбзазара зегь неидкыланы изныԥшуа Аԥсуашәа акәын. Ашәа аҭҵаареи, аиқәырхареи, изызҳауа абиԥарақәа рымадареи рзы акыр аԥынгылақәа дрыниазаргьы, игәы ацәкажьны даԥырымҵит, еиҳа «схы ахьныҟәызгаша» ҳәа аҭыԥ ԥхақәа дхырымхит. Избанзар, иара хаҭала дызлааӡаз, зыхьӡ нагоу иабшьҭрақәа рдоуҳа данысабиӡаз инаркны ишьа-ида иалан.

Еилкаауп абаҩхатәра агәаӷьра дугьы ацзарц шхымԥадатәу. Иахьа абас сҳәар, мамзаргьы изуыр, уаҵәы сыԥсҭазаара иаԥырхагоуп ҳәа дхәыцӡом ԥсабаралатәи абаҩхатәра, абаҩхатәра иашаҵәҟьа ҳәа ззырҳәо заҭәашьоу. Ижәлар раҵкыс ихы еиӷьеишьом иара, рхьаа ахәрыбӷьыц еиԥш дазыхәшәхоит. Урҭ иреиуоу аҵеицәа дыруаӡәкын зыԥсаҭа шкәакәахаша Иван Сафар-иԥа Шамба.

Акультура Аминистрра гәалсра дула ирыдашшылоит Иван Шамба иуацәа, иҭынхацәа, иҩызцәа. Иван Шамба иԥсҭазаара алҵра атәыла амузыкатә еилазаара зегьы азы даара цәыӡ дуны иҟалеит.