Ахәышәтәырҭа аҳақьым хада Ирина Ануа аминистр ачымазцәа хәшәылеи фатәи-жәтәи рыла иахәҭоу аиқәыршәара рымоуп ҳәа иалҳәеит. Аха ахәышәтәырҭа  акыр аамҭа ҵуеит асанитартә ӡышьҭра аганахьала ауадаҩрақәа амоуижьҭеи. Урҭ шьаҭанкыла реиҭашьақәыргыларазы иазоужьуп  3 млн. 743 нызқь мааҭ.

Ирина Ануа лажәақәа рыла, атрубақәа иахьрыцәцо иахҟьаны, уадақәак акыр ааха роуит.

Аусурақәа мҩаԥнагоит аҳәынҭқарратә еилахәыра «Аԥсныргылара». Ԥшь-еихагылак рҿы аӡымҩангагақәа  рыԥсахраны иҟоуп, аҽыкәабарҭақәа рҿы акафель шьҭарҵоит, асантехника зегьы рыԥсахуеит, арлашагақәа дырҿыцуеит.

«Ҳара  шьаҭанкыла ари апроблема уаҳа ҳазыхнымҳәуа иҳаӡбароуп. Ачымазаҩцәеи аперсонали ирзыманшәалоу аҭагылазаашьақәа аԥаҳҵароуп. Аремонт уажәоуп ианалага, сара хаҭала уи амҩаԥысшьа шцо гәасҭалоит», - иазгәеиҭеит Едуард Быҭәба.