Уи ихы алаирхәит Аԥсны Аҳәынҭқарра Ахада Аслан Бжьаниа, ҳәа адырра ҟанаҵоит Аҳәынҭқарра Ахада ипресс-маҵзура.   Аԥсны Аҳәынҭқарра Анапхгареи Зҭакԥхықәра Ҳәаақәҵоу Аилазаареи «Аинфраструктуратә Рҿиара» аҳәынҭқарра-хазхаҭалатәи апартниорра азы Аиқәшаҳаҭра рыбжьарҵеит.  Аиқәшаҳаҭра аҳаиртә еимадара аиҭашьақәыргылара хықәкыс иҟаҵаны В.Г.Арӡынба ихьӡ зху Жәларбжьаратәи аҳаирбаӷәаза «Аҟәа» амазаратә комплекс аиҭашьақәыргылара амҩаԥгара иазкуп. Аусшәҟәы анапаҵыҩра Урыстәылатәи Афедерациа аекономикатә ҿиара Аминистрреи Аԥсны Аҳәынҭқарра аекономика Аминистрреи аинвестор иалкаара азы имҩаԥыргаз аконкурс аихшьаалақәа рыла имҩаԥысит.   Аиқәшаҳаҭра анагӡара аҳәаақәа ирҭагӡаны аеродром ахархәаратә хәарҭахара еиҭашьақәыргылахоит. Аинвестор зоура 3 100 метра, зыҭбаара 45 метра рҟынӡа инаӡо ашьҭыԥраарҭа-тәаратә цәаҳәа ареконструкциа мҩаԥигоит, уи иабзоураны ҳаамҭазтәи Урыстәыла иҭрыжьыз реиԥш аҳәаанырцә иҭрыжьызгьы аҳаирпланқәа рыдкыларазы алшара ҟалоит.   Апроект ала иазԥхьагәаҭоуп аеродром аҿы иҿыцу аиқәырхаратә станциа аргылара, иара убас аӡышьҭратә шьақәгылазаашьеи арыцқьаратә еиқәыршәыгақәеи рышьақәыргылара, аҳаирплан шьҭԥраарҭа аҵаа ақәлара ацәыхьчара иазку  аусурақәа рымҩаԥгара уҳәа убас жәларбжьаратәи астандартқәа  инарықәыршәаны аусмҩаԥгатәқәа рынагӡара. Иргылахоит иара убас иҿыцу апасаџьыртә терминал, ирҿыцхоит аҳаирбаӷәаза аҭоурыхтә хыбра аҭеиҭыԥш. Атерминал ҿыц акәша-мыкәша еиҿкаахоит зымҽхак ҭбаау апарктә зона. Аҳаирбаӷәаза аҭоурыхтә хыбраҿы аофициалтә хаҿқәеи аделегациақәеи рыдыркылалоит. Иҿыцу аҳаирбаӷәазатә комплекс ҿыц  сааҭк иалагӡаны иаунажьыр алшоит 1300-ҩык апасаџьырцәа. Атерминал ҿыц аргылара инамаданы, аҳаиртә баӷәазаҟны иргылахоит егьырҭ административтә-усеиҿкааратә хыбрақәагьы, абылтәыҭаҭәарҭатә комплекс назлоу.

 «Аԥсны Аҳәынҭқарразы аҳаиртә баӷәаза аусура аиҭахацыркра, ҳәарада, акрызҵазкуа хҭысуп. Ишдыру еиԥш, ари аԥхьа апроект анагӡаразы аԥҟарақәа ҳәаақәызҵо Аиҳабырабжьаратә еиқәшаҳаҭра азырхиара иазкыз аусура ду мҩаԥган. Иахьа изҵаҩу аҳәынҭқарра-хазхаҭалатәи аусеицуразы Аиқәшаҳаҭра ишьақәнаргылоит аҿҳәара, аԥҟарақәа, акомплекс арҿыцреи аиҭашьақәыргылареи  ирзоужьхо афинансқәа рымҽхаки уинахыстәи ахархәара шымҩаԥысуеи.  Аҳәынҭқарра иахатәтәны инхоит аеродром, аеродромтә инфраструктура, аҳаиртә вокзал аҭоурыхтә хыбра, ҩ-ҵакык змоу аобиект астатуси ахьӡи «В.Г. Арӡынба ихьӡ зху Аҟәа ақ. Жәларбжьаратәи аҳаиртә баӷәаза».

 «Ҳаԥхьаҟа иаҳзыԥшуп апроект анагӡаразы еицаҳзеиԥшу аусура. Агәра ҳгоит, аҳаиртә баӷәаза аусура ҳтәыла аҿиара иацхраауа ак акәны ишыҟало", - лҳәеит аԥыза-министр актәи ихаҭыԥуаҩ, аекономика аминистр Кристина Озган.

Рашид  Нургалиев, ЗҲӘА «Аинфраструктуратә ҿиара» зхатәу, Аԥсны анапхгара иҭабуп ҳәа реиҳәеит ирыдигалаз аҳаиртә баӷәаза арҿыцразы апроект адгылара ахьарҭаз. «Аԥсны аԥсшьарҭақәа рахь атуристцәа иаадырԥшуа аинтерес есышықәса иазҳауеит. Аҳаиртә баӷәаза аартра иабзоураны аԥсшьаҩцәа ирласны, насгьы иманшәаланы Аԥсны акурортқәа рҭаара  алнаршоит», -  иҳәеит иара, иагьазгәеиҭеит  ҳаамҭа иақәшәо аҳаиртә баӷәаза ареспублика иамоу атуристтә лшара аизырҳара ишацхраауа.

 «Ҳара нап аҳаркуеит зымҽхак ҭбаау апроект анагӡара, аԥхьа игылоу хықәкуп - аеродром аиҭашьақәыргылара. Аамҭа кьаҿк иалагӡаны аперрон ырҭбаахоит, ирҿыцхоит аԥсҟы мҩақәеи ашьҭԥраара-тәарҭатә цәаҳәеи, иара убас алашарардыргала еиқәыршәахоит. Уи хымԥада иаҭахуп Аԥсны Аҳәынҭқарра жәларбжьаратәи аимадара ахацыркразы», -  иҳәеит Зҭакԥхықәар Ҳәаақәҵоу Аилазаара «Аинфраструктуратә Рҿиара» адиректор хада  Сергеи Грибков. Иара убас иазгәеиҭеит иуникалтәу аҳаирвокзалтә комплекс аргылара ишалаго, иҳәеит агәра шиго  Аԥсны Аҳәынҭқарра ауааԥсыреи аԥсшьаҩцәеи Аҟәа аҳаиртә баӷәаза  ишақәнагоу еиԥш ахә шыршьо,  аамҭақәак рнаҩс ахәшьара ҳарак шарҭо. Анапаҵаҩра иазкыз аусмҩаԥгатә иалахәын Аԥсны Аҳәынҭқарра Ахада ихаҭыԥуаҩ Бадра Гәынба, Аԥыза - аминистр Александр Анқәаб, Аԥсны Жәлар Реизара Аиҳабы Лаша Ашәба, Ахада Иадминистрациа Анапхгаҩы Абесалом Кәарҷиа, Аԥыза –аминистр актәи ихаҭыԥуаҩ, аекономика аминистр Кристина Озган.