Омар БЕИГӘАА

«Абызшәа зегьы раԥхьа игылоуп,

уи зегьы аҵанакуеит»

                        Дырмит Гәлиа

АԤСЫШӘА

 

Аԥсышәа аиԥшы бызшәа кәаза

Дгьылтәылангьы ианым.

Уыи наӡаны иыздыруа

Изаламҳәара ҟаларым.

Иалаичаԥаз ажәаукгьы

Иазҟазау изы тәымхарым,

Имаҳацзаргьы иыниаҳалакь

Изымдыркәа даанхарым.

 

Аԥсыуа жәлар атәым тәылақәа

Иыԥсаҟьаны ирылаԥсауп,

Еишьеи еижьреи зеибамбауа,

Иеизынхьыуа иеизрыцҳауп,

Тәым ажәала раԥсшәақәа

Еицәыхазхар ирыцҳауп…

 

Гәреибагареи, еицхыраареи,

Еибааӡареи рыбжьалааит,

Даусы ртәылеи рхатәышьеи

Рықәиҭзаара раӡалааит!

 

---

Баграт ШЬЫНҚӘБА

Аԥсны жәлар рпоет

 

***

Ашьха ӡыхьеиԥш ахьхьа-хьхьаҳәа,

Аԥсшәа бзиа избоит сара.

Иамаӡамкәа хьаҳәаԥаҳәа,

Иқәыҩлааит Аԥсынра!

        

         (Ароман «Аҿатә уаа» аҟнытә)

 

АХАТӘЫ БЫЗШӘА ЦӘАЖӘОИТ

 

Ахаангьы ус ауп, сҿахәы ҭасыжьуам,

Гәаӷшақә исышьҭоу хаирк ибауам!

Зқьы шықәсақәа срымадоуп, срыҟәрыжьуам.

Иӡрыжәу ҟамоуп бзанҵык сцагәуам!

 

Ҵла ҩак ақәцәан ҵыс ҭыҩрак сыхшәазшәа,

Анаатә сымҵарс сагоушәа сҟьаны,

Машәыршақә Аԥсныҟа саанагазшәа

Уи нахысгьы саанхазшәа ссасны…

 

Адгьыл иадырҳарц рыбжьы снахырҵәа,

Абас гәаӷшақә џьоукы сеимдырххоит.

Аха идыруп, мыцҳәықәла, мцахәыцәа,

Ашәи ишьҭоуп, ихы даӷахоит!

 

Ҳаи, џьушьҭет, ма сыԥшӡара рбахьандаз,

Игәырӷьан сиеиԥшныршьалоит аԥсхых.

Ма ахьхьаҳәа сыбжьы хаа аҳахьандаз,

Ишырҭаху иаадыркшоит сҭоурых.

 

Аԥсынтәыла ауп сара сымра ахьгылаз,

Ара сшықәӷьацоз – разҟыла иӡбан.

Сацәнымхартә амҩан ахәрақәа иснылаз,

Урҭ ршәахсҭақәа гәарҭаӡом, избан?

 

Сыбжьы нахыҩуан ашьха ҩаӡара,

Илԥха саҳәон Ажәеиԥшь – Жәеиԥшьырҟан.

Абҩа зырҭәоз нахьхьи Башкаԥсара,

Исхықәаауан, дара рзы сымран!

 

Иагараан сшьа ныхҭәалахьан – аӡы-мшын,

Аха сыбжьы акәын аиааирашәа зҳәоз.

Нарџьхьоу сыбжьала сымш, сыҵых имшын,

Гәында шеишеи дымҵарс данааигоз.

 

Абрыскьыл ишьҭаз аҳаԥы ианҭала,

Сыбжьала ҿырҭуан, ихьыӡ ҳәаны,

Анарҭ ҭоуба иуит сиашаҳәарала,

Ақәабгьы хыҵт, агәараҳәа ишны.

 

Исҳәарызеи ҳәа аҭырџьманцәа сыкәшон,

Диоскуриа анеибгаз анкьаӡа зны.

Аԥсымҭәқәа цәырҵуан, ацәгьара дыршон,

Дара аԥшәымацәан, сара ссасны!

 

Арха, абна, абаажә хыҽҽара,

Амшын иазцо ҳӡиасқәа еивас,

Зегьы ирыласоуп сдац еибаркыра,

Са сылоуп излацәажәо бызшәас!

 

Дышԥарыцҳау зашьа иҵашьыцыз,

Ныџьнатә тәамбашақә згәыла изыԥшуа!

Уаҩреи ламыси зегьы-зегь зцәыӡыз

Иаарласны иҿыцәоит амра ихашуа!

 

---

Мушьни ЛАШӘРИА

Аԥсны жәлар рпоет

 

ҲАБЛАГӘ – ҲБЫЗШӘА

 

…Ҳаблагә-Ҳбызшәа

Аԥсынтәыла зыхӡыӡоз,

Аԥсуаа ҳашҭа иҭаԥхоз имраны,

Абиԥарақәа рыԥсҭазаара зқәырҵоз,

Исҭахым даҽа ԥсҭазаарак,

Уаныҟам аҽны

Ҳбырлаш-ҳбызшәа!

Ҳҭоурых, ҳшьаҭамырӡга!

Гәеисрак еицҳамоуп, исызшауам.

Абжьы-хаа иухылҵуа са сзыҳәа ианымга. –

Ҽак иарбан иго?!, -

Уи сыхнахуам, сазхьуам!

 

Уара иуҿагылоз –

Сара дысҿагылон,

Уаныҟам – сҟаломызт сара схаҭа!

Исыӷрагылоз – уара дуӷрагылон,

Убӷа еиҵыхзар,

Еиҵыхын слакҭа!

 

Иҵәахуп уара уҿы: ҳашәа, ҳагәҭыха,

Ҳажәабжьқәа, ҳлакәқәа,

Ҳтәыла аҭоурых!..

Иҵәахуп уара уҿы:

Зегь рракәа, рыԥҽыха, -

Аамҭа ӡеилыҽҽа-еибафа иаӷәых!

 

Ҳшьаҭамырӡга, ҳбызшәа!

Агәҳәԥыхш уаҳзаҩызоуп!

Иуҿагыло ҳаинышәаран ҳаҟам,

Мамоу!

Баагәаран уҳамоуп,

Иаҳзылашо цәымзоуп,

Ҳхаҵашәа, ҳахәрашәа!

Ҳмыткәмашәа! Ҳуоу!

 

Уа ула иҳааӡон аԥсуа абиԥара,

Уа ула адунеи агьама дҳаркуан!

Ақәаб дыршуан, уа ула сыԥс-ҭыҩра,

Уа ула, сбызшәа, сыгәҭыха сыҩуан!

 

Уҟаз, сбызшәа!

Уеҵәахә кыдыз!

Риеҵәахә кыдыз аԥсуаа рхәыҷқәа!

Наӡаӡа иҳаӷоу – наӡаӡа дымчыдаз!

Иурлашалааит ҳаҩнаҭақәа!

 

---

Рушьбеи СМЫР

Аԥсны жәлар рпоет

 

СБЫЗШӘА

 

«Аллаҳ иџьшьоуп ҳаилибаакауа ахьхьа-хьхьаҳәа ҳаицәажәалартә ҳахьыҟоу! Ҳзықәшәалакгьы ҳбызшәа ҳаԥсы иаҵаҵаны иҳамазароуп! Уи ауп ашьаҭамырӡга!» - лҳәеит Ҭырқәтәыла зыҩныҟа ҳназыԥхьаз Ирдем Аншба иан Ака-ԥҳа.

 

Дгьыл наӡарак аҿгьы усцәымӡит

                                       сгәыӷра лаша, схәыцырҭа,

Адыд-мацәыс уазымбылӡеит, схыҵхырҭақәа

                                                                     рхыҵхырҭа!

Зыбыз ҭшәаз аҵәҵәа зыԥсозеи –

                         жьакца хьшәашәа аԥсыжырҭоуп,

Амца ахьыцәаз ашәа аԥырҵом –

                                        наӡаӡа лахьеиқәҵароуп.

 

Имиц изы ауеимадаҳәа аӡәымзарак

                                                    дҵәуаӡом,

Аха агәлымҵәах иеҵә кыдшәар,

                                        агәы ԥшқақәа ирылаӡом.

О, сбызшәа, са сықәра нага, сыҵх еиқәа,

                                                   сыхәраҭыԥ,

Сгәырҩа еихымсыӷь, сҟармаҵыс хәыҷ,

                                           срадагәышьа, сынасыԥ.

Сдунеи ҿыха, сыхьӡырҳәага, сышьыжь лаша,

                                                    сдаракәыц,

Шьауардыншәа сума унеила, аамҭа

                                     еикәшара саламӡырц.

Ашҳам урҭом кәарма-кәарма,

                             удырдагәа – дырлашәуан,

Ушьҭа анырхырц рҽырхаҵо, ашәы џьарнах

                                                 укәдыршон.

Аха сашьцәа ураԥхьагылан, ргәы шьҭыхуа,

                                              ихәымжәакәа,

Рыԥсы уаҵарҵон наӡаӡа, узҷаԥшьоз

                                               агәымшәақәа!

…Ӡыхь ахьыҵымҵуа ахьхьа-хьхьаҳәа,

                                       алакар хырҵаӡом,

Узыҿшәазгьы ииурызеи –

                                      аԥшәымарак илшаӡом.

 

Уара, сашәа, сшәаџьҳәаҩ рыцҳа,

                              сыламыс, сыгәҭыхаҳәаҩ,

Сымҩа ҭабга, схьаԥшьа ҭаҵәах, сықәра наха,

                                                 сныхаԥаҩ.

Сдунеи ҿыха, сыхьӡырҳәага, сышьыжь лаша,

                                                          сдаракәыц,

Шьауардыншәа сума унеила, аамҭа

                                  еикәшара саламӡырц!

Уа ахәрыбӷьыц хәыҷ ахьыҵырхуаз,

                             ухьаҷаҷаны уныҵарԥсон,

Зыдгьыл гәакьа зыԥсшьарҭахоз,

                             улабжыш наиқәыԥсон.

…Гәаҟ ажәабжь иамырхәыцыз, ианаамҭоугь

                              дызгәырӷьаӡом,

Зан лкыкахш мап ацәызкуа, ԥсаҭа шәкәакәа

                                            изылԥхаӡом.

Хәышҭаарак уарԥхом уагәҭасыр –

                               иузыраззар, уашәахәуп!

Аеҵә каҷҷа угәра ргазар, урҭ рымаӡагьы

                                                    уалахәуп!

Аццышә иалҵыз сбызшәа рыцҳа –

                      сжәытәи сҿатәи реиԥшьырҭа,

Ашьа иалгоу сбызшәа нага, -

                      сгәи сыԥси зегь реиқәшәарҭа.

Сдунеи ҿыха, сыхьӡырҳәага,

                       сышьыжь лаша, сдаракәыц,

Шьауардыншәа сума унеила, аамҭа

                       еикәшара саламӡырц! 

---

 

Витали АМАРШЬАН

Аԥсны жәлар рпоет

 

СБЫЗШӘА

 

Бзиа ушԥазбо, сыԥсықәара,

Бзиа ушԥазбо, о, сбызшәа!

Уара исуҭоит амч-алшара,

Уара ула еисуеит сшьа.

 

Уара уансыгха – адунеи збашам,

Са срыцҳахоит, сеибахоит.

Сгәы иҭоу ҭыган исызҳәашам,

Ихаҳә хьшәашәан уа иҭахоит!

 

---

Алықьса ЏЬОНУА

 

АХАТӘЫ БЫЗШӘА

 

Уҽацәхьоумкын, уарбанзаалакь,

Ухатәы бызшәа аҳәара.

Уацәыԥхамшьан, ианакәзаалакь,

Уиала убжьы аргара.

 

Ҽак уҵаанӡа, уарбанзаалакь,

Ухатәы бызшәа ҵа,

Убриала ԥхьаҟа ишулшо

Ашьаҿа ҟаҵа!

 

Убриала угара ҟазҵаз

Уабду игәы нагӡа,

Убриала угарашәа зҳәаз

Уанду лгәы ҟаҵа!

 

Урҭ адунеи ианаԥырҵуа

Рышьҭамҭа азырҳа,

Хатәы бызшәала, рхан иауырсуа,

Ахаҳәаҿ ҳәоук анҵа!

 

Уԥсы шҭоу ухатәы бызшәа

Аԥсра анахьӡа,

Ухатәы бызшәа тәымушәа

Уара угәы анацәца –

Убасҟан ауп быжьрабыжьҵәа

Ухаҭажә уанца!

 

---

Иван ҬАРБА

 

СБЫЗШӘА

 

Абжьы ссир ахоуп ахьхьаҳәа,

Сышьхақәа рҟынтәи илашьҭуп,

Иныжьны бызшәак ахь сызхьаҳәуам,

Са сзыҳәа имариоуп, иласуп.

 

Иаралоуп усгьы сышхәыцуа,

Сгәы иҭаскуа аанмыжькәа изҳәо.

Сбызшәа ссир – амбатәқәа зхыҵуа,

Абжьыцқьа еицамкуа изхоу.

 

Сабацәа ршьала иӡрыжәу,

Санацәа ргәала ирԥхоу,

Аԥсуа иеиԥш аамҭаҿ иҽыжәу,

Аԥсуаа ирыхӡыӡа ирхоу.

 

Аамҭақәа ирылго, еидкылан,

Сыжәлар иахьанӡа иаазгаз,

Аԥсшәа хазына – иҩагылан

Аԥсуаа рыгәҭыхажәа зҳәаз!

 

Агәаҟ бжьазы акәхап изырҳәоз

Даараӡа ицәгьоушәа аҵара.

Аԥсуа дацәшәоназ дыԥсыр ҳәа

Далаԥсны икгәышьан иара!

Ирзымгеит аԥсуа иааиҿыхны,

Иҟоуп ишыҟац уи иҟны,

Иааигеит бираҟҵас ишьҭыхны,

Ихеигалт иахьа иҳаракны!

 

Сбызшәа хазына, зда схәарҭам,

Са исыцыз, насыԥны исыниаз,

Сгәы амаӡа хтыгас иансырҭа –

Ҳаицрымшәо наӡаӡа ҳаимаз!..

 

---

Гьаргь ГӘЫБЛИА

 

ҲХАТӘЫ БЫЗШӘА

 

Ан лкыкахш еиԥш,

Ҳхәыҷаахыс ҳқьышә иқәку,

Ҳаблақәа хызтыз, изырлашо ҳхаҿы,

Уара ҳулхәдан ҳҟалар ҳахьагоз абыкәу,

Усҟан уххаӡа узакышамызт ҳгәаҿы.

 

Уара уоуп Абрыскьыл ибзарӡы ҳаразкыз,

Сасрыҟәа хаҵа ихьӡ ҭызгаз, еиқәзырхаз,

Гәында-ԥшӡа лсахьа ҳгәаҵаҿ иҭызхыз,

Алакә ссир ажәҩа азҭаз, ԥсыс иахаз.

 

Шәа гәазырҳаган уцәырҵуан зны ачараҿ,

Ныҳәаԥхьыӡны – иангылоз аԥаҭхьқәа кны.

Аҵу-ҵуҳәа угон зынгьы аҵх лашьцараҿ,

Мытәкәманы аккаҳәа угон аԥсраҟны.

 

Зыҵәҩаншьап азырсыз игәырӷьара уалан,

Ихҵәазгьы уа уакәын, изгәылакыз иуаз.

Аԥсадгьыл уқәҩуан хақәиҭратә ашәала,

Зынгьы, ааԥхьарак еиԥш,

Ҳашьхараҿ умгауаз.

 

Уара уда ихырҳагам аԥсуа инхара,

Уара уда илахҿыхым уи иҿара.

Уара уаницу, игәы иамҵәом аԥхара,

Иҿаԥх-ҿабзуеит игәара, ихәышҭаара.

 

Уара уоуп иеҵәахә змыркьаҭо,

Игәашьамх зырџьбаро, иҟазҵо иҵары.

Ацәгьа-абзиа гәазҭо, ахы азҭо,

Агәҭакы змырӡуа, инахо аԥсынҵры.

 

Ҳгәы уздууп, уҟәнаҳшьом иахьа акала,

Ахьхьаҳәа урылыҩуеит абызшәақәа.

 

---

Мушьни МИҚАИА

 

АԤСШӘА

 

Ашьха шьанҵа мышкызны инаҿыҵшәаз,

Аԥсуа ибызшәа ӡи-мцеи ирцәынхаз.

Ахра инаҿалашеит ааԥны мшыказ,

Ԥсраҽнынӡа аԥсуа хаҵа иҿахәы изырҳәаз.

 

Аӷа иабџьар еибазмыргаз аԥсшәа,

Ахрагьы даҿнахит, ахра иаҿахаз.

Аԥсуа хаҵа аԥсышәала иҳәеит ахәрашәа,

Аԥсшәа кәалӡы ҩацоуп сыжәлар ирҭынхаз.

 

Аԥсшәа амаҭаԥшь ашҳам аҿнаххьеит,

Аԥсшәа аӡхьамԥш ахәараҳәа изыршыз.

Аԥсшәа аӷа цәгьа иҳәаҭҳа ихнаххьеит,

Амацәаз ахы иҭацалан, ар еикәазырҳәыз.

 

Аԥсшәа, аԥсуа иламыс гәашьамхыс иаҵоу,

Изырԥшӡо, изырҵәуо ан мыжда луаз.

Аԥсшәа, дасу зегь анасыԥ рызҭо,

Дасу иахьрыхьуаз рыхәрақәа зырӷьаз.

 

Сара саԥсшәа знымаало адунеи

                                              акгьы ыҟаӡам,

Иалымшогьы егьыҟаӡам аԥсуа ибызшәа.

Аԥсуа аԥсуа ибызшәа ҽеила идыруазар,

Уи адунеи аҿы зегь имоуп ҳәа ишьа!

 

 

---

Борис ГӘЫРГӘЛИА

 

АХАТӘЫ БЫЗШӘА

 

Сара сбызшәа рҿыҵакуп

Сышьхақәа сзыхшаз.

Урҭ адунеи иахаануп,

Уи акәхап ас изшлаз.

 

Сара сбызшәоуп ирхылҵуа

Сырҩаш ҭрысқәа бжьыс.

Са сқыҭақәа, сыбла ихымҵуа,

Сбызшәоуп ирхоу ԥсыс.

 

Сара сбызшәала ицәажәоит

Сыдгьыл – нас ишԥа?!

Сара сбызшәала игәжәажәоит

Сымшын ацәқәырԥа…

 

Сара сбызшәала ицәажәом

Миллионҩыла ауаа,

Аха сбызшәала ицәажәоит

Зқьышықәсала ауаа!

 

Иџьашәымшьан хатәы бызшәада

Сгәеисыбжь цқьа ишәмаҳар,

Сан слааӡар хатәы бызшәада –

Иалшон сҿаҳахар!

 

 

---

ВЛАДИМИР АҴНАРИА

 

АԤСШӘА

Аԥсшәа! Исыцыршаз сажәа,

Гәыԥҳәыхшҵас изырхәыхә сҟырҟы,

Ԥсра-ӡра зқәым жәлар ражәа,

Уара сыблагә, схы, са сыԥсы.

 

Изызбозеи адгьыл ҭабгошәа,

Изызбозеи хәлар имшауа,

Изызбозеи амра ҭашәошәа –

Џьара аԥсышәак са иансмаҳауа?

 

Акаамеҭ ззырҳәо ҟаларгьы –

Усеиԥш анцәа ҳҭоумырԥшын!

Машәырны саӡәыкны сеиқәхаргьы,

Сҵаа-ԥшаауа са снаҵысрын.

 

Иқәблааз геи-шьхеи сырхысны,

Аԥсышәак ахьырҳәо снаӡарц,

Ӡи-мцеи ирзымгаз насыԥны

Аԥсыуак инхарҭа сыԥшаарц.

 

«Ахәра ашәа» еицаҳҳәап ҳнеидтәалан,

Илеиҩеиуанаҵ уаҟа ҳаԥсыԥ,

Аԥсышәала ҳшеицәажәо хаала

Ҳаԥсуазаргьы – ҳшаԥсыуаау ҳаԥсып.

 

Аԥсшәа! Уаныҟам сыгәнаҳауп,

Сҿахәы сзарҳәаӡом адунеи,

Узқәиааз адгьыл ссир ԥсраҳа,

Уԥсӡом! Урхыҩла геи-шьхеи!

 

Аԥсшәа! Исыцыршаз сажәа,

Гәыҳәԥыхшҵас изырхәыхә сҟырҟы,

Адунеи ду иақәлоу жәлар ражәа,

Уара – сыблагә, схы, са сыԥсы!

 

---

 

НИКӘАЛА КӘЫҴНИА

 

САРА СБЫЗШӘА

Абра, шьхатәылан, аӡиас хагақәа

Рыцәқәырԥа шлақәа ахьцо ихәашхәаша,

Агарашәа ахьылҳәоз сан игәыҭгагаха

Исызгәакьоу сбызшәала есымша.

 

Алакә ссирқәа еиҭарҳәоит лассы-ласс

Ҳабацәа, алакәҳәара азыҳәан ишоу.

Схәы-сжьы еилазыргылаз, сгәы рхаҵо сзыргылаз

Урҭ алакәқәа еиҭазҳәаз сбызшәоуп.

 

Сбызшәами Нарҭаа мыӡкәа излацәырҵыз,

Иахьа дызлааиз Акьахь дыхраха;

Зыԥсадгьыл иаԥырҵуаз, Амшын еиқәа ихырҵаз,

Хәанчара амыхькәа иахьанӡа ирзынхаз.

 

Иааргеит, иҳарҭеит, идмырӡит, еихаҳаит,

Ишәҳәа ҳәа ҳарҳәеит абриала шәҿахәы.

Идмырӡааит, еихарҳааит, идмырӡааит, еиҭарҳәааит,

Ирхыҩааит архақәа, ашьхақәа, ахәы…

 

Саԥсазтәыз, суаҩызтәыз, сыԥсымкәа сыбзазтәыз,

Сыгәҭыхақәа зласҳәо смырҳакәа – сымшәа;

Сабацәа дуқәа рҵеира саԥсазтәыз,

Сзааӡаз сара сани Дырмити рбызшәа!

 

 

---

ТАИФ АЏЬБА

САРА СБЫЗШӘА

Сан даԥсыуоуп,

Саб даԥсыуоуп,

Са саԥсыуоуп

Схаҭагьы.

Сани саби

Исдырҵазоуп

Сызлацәажәо

Сбызшәагьы.

 

Са сбызшәала

Исҳәоит мариала,

Иарбан? –

Исҭаху зегьы.

Уи са сажәоуп,

Уи са сашәоуп,

Иалаҩашьом

Даҽакгьы.

 

---

ЗАУР КӘАРҶИА

 

СБЫЗШӘА

Сбызшәа – исыгәҭыхоу,

Исныхоу, исхьаау.

Исцәыӡхьоу, сызцәыӡхьоу,

Исгәыӷроу сзышьҭоу.

Исхәыцроу, исџьынџьу,

Исԥашәу, исҳәаау.

Иҿатәӡоу, ижәытәӡоу,

Иаҿаҳәҳәагоу с-Аԥсны.

О, сбызшәа – схақәиҭра,

Сыгәҭыха, схықәкы.

Сызкәыхшоу, ижәытәӡаӡо,

Уара уоуп исгәыӷырҭоу.

 

 

---

ИННА АҲАШБА

 

АПОЕТИ АБЫЗШӘЕИ

Д. Гәлиа изкны

Сдәықәлеит, сахьцо сзымдырӡо,

Сахьцоз изгоз сзымгаӡо.

Снеиуеит ҵхыла ишозар ҳәа,

Ашаеҵә џьара избозар ҳәа.

 

Ҳбызшәа зҿыҩуаз ҳашьхақәа,

Иҵырхызшәа рдашьхәақәа,

Руапа ҟәашқәа карыԥсон,

Алашбжьқәа еиларыԥсон.

 

Сбызшәа схьаа зласҳәалоз,

Сыхҭыс лакәқәа еиҭазҳәалоз

Назгон, аҵх исзалымго,

Сыҩни-сгәареи сналыгәгәо.

 

Сбызшәа аныӡ, ишәасҳәароуп,

Аԥша знеиуа сшәаџьҳәароуп.

Сеидру наҟ иаҳцашьахо,

Ҳарсуп хьтәы лабашьаха.

 

 

---

БЕЛЛА БАРЦЫЦԤҲА

СБЫЗШӘА

Сбызшәа мрахәагоуп, сбызшәа рыԥхагоуп,

Сбызшәа хәырбӷьыцуп, уи нырхагоуп.

Сбызшәа Нарџьхьоууп, игәырӷәӷәагоуп,

Сбызшәа Браскьылуп, уи Сасрыҟәоуп.

 

Сабдуцәа ирҷыцуп сгәашә иаџьынџьуп,

Сбызшәа абџьаруп, и-Камаҷыҷуп.

Милаҭс иҟоу зегьы ирцәанаалоуп,

Сара сзыҳәан уи жәеинраалоуп.

 

Сызгарҵыз сгара сбызшәала иныҳәоуп,

Сызҭиааз сгәара иара иаҿаҳәҳәагоуп.

Сан лгәыԥҳәыхшоуп, ишьацаагагоуп,

Сӡыԥшаҳәа, сӡиа зегьы иргәакьоуп.

 

Сбызшәа арԥысроуп, иҭыԥҳароуп,

Жьрацәра еиларсуп, уи ҭынхароуп.

Ахәра иашәоуп, ахәра иарӷьагоуп,

Ҩыза рҳагоуп, гәаҟра хгагоуп.

 

Сбызшәа хәышҭаарамцоуп, ишьха ӡыхьуп,

Уаҿыхәа, ихәшәымцоуп, ицқьоуп, еиҵыхуп.

 

Маӡа ҭаҳәҳәагоуп, баҟа еиқәырхагоуп,

Збызшәа зԥырхагоу џьызшьо дхагоуп.

Иашҭа иҿоу игәашәгьы еиқәароуп,

Аргама амца зыцреиҵа игароуп.

 

Зан мап лцәызкыз – дуџьабароуп,

Уангьы длаҩсуам – уи духьчароуп.

Ихы даӷоуп, ҳаӷоу дбызшәадоуп,

Ишьҭагьы шәарҭоуп, игәгьы ашәадоуп.

 

Зыбз зыхәлам иуарҳәоит ицқәа,

Иалшои амахә, иҵху здацқәа?

Сбызшәа ҳәаадоуп, зегь ҳаимаздо ауп,

Ҳа ҳазлаԥшӡоу – Сбызшәа иаҳамҭоуп.

 

 

---

 

АДГӘЫР ГӘЫНБА

АԤСШӘА

Сгәырӷьоит Анцәа Ду дызбазшәа,

Сгәырӷьоит аԥсшәа ансаҳауа.

Сгәырӷьоит аеҵә кыдысԥаазшәа,

Ианызбо аԥсышәала иҩуа.

 

Иҳазгәаҭаӡом ишмалу,

Уи ада ҳгәашьымхқәа ӷәӷәахом.

Хара ихәыҵаршә агәаӷь иалоу,

Ашәыр гәаӷьеиԥш иузыԥҽом.

 

Изҭахым ааигәа днанашьҭуам,

Изыннажьуам гәашәк ҵрааны.

Агәы ԥызжәазгьы дахашҭуам,

Ахәцә зкызгьы иҵкааны.

 

Сгәырӷьоит Анцәа Ду дызбазшәа,

Сгәырӷьоит аԥсшәа ансаҳауа.

Сгәырӷьоит аеҵә кыдысԥаазшәа,

Ианызбо аԥсышәала иҩуа.