Абасала аҩ-ҳәынҭқаррак рзакәанԥҵарақәа реишьашәалара ашьаҭала Урыстәылеи Аԥсни ирзеиԥшу асоциал-економикатә ҵакыра ашьақәыргылара апрограмма анагӡара иазкны  жьҭаарамза 17 рзы, Урыстәылатәи Афедерациа аекономикатә ҿиара Аминистрра аҿы  имҩаԥысыз аусуратә гәыԥ аилатәараҿы  игәаанагара иҳәеит Урыстәыла аекономикатә ҿиара аминистр ихаҭыԥуаҩ Дмитри Вольвач.

Аусуратә гәыԥ ацхантәаҩцәаны иҟоуп Урыстәыла аекономикатә ҿиара аминистр ихаҭыԥуаҩ Дмитри Вольвачи Аԥсны аԥыза-министр ихаҭыԥуаҩ, аекономика аминистр Кристина Озган.

Дмитри Вольвач иажәақәа рыла, «арҭ аусмҩаԥгатәқәа аинтеграциатә проекткқәа рацәаны рынагӡареи ҳтәылақәа ринвестициатә потенциал ашьҭыхреи алдыршоит».

Аиԥылара аҿы уи алахәылацәа апрограмма анагӡара аихшьаалақәа ҟарҵеит, иара убас ирылацәажәеит уи анагӡара иадҳәалоу актуалра злоу азҵаарақәа жәпакы – ҩбаны иҟоу ашәахтәқәҵара, аҳазылхратә усеиҿкаара, асоциалтәи абанктәи усхкқәа русмҩаԥгара аиҿкаара,  уҳәа ирыдҳәалоу азҵаарақәа.

«Ҳазҭоу ашықәс – ҳтәылақәа рзакәанԥҵарақәа реишьашәалара азы аусмҩаԥгатәқәа анхҳаркәшо ауп, – ҳәа азгәеиҭеит аминистр ихаҭыԥуаҩ.  Апрофильтә хылаԥшырҭақәа апрограмма апунктқәа рынагӡара иазкны активла, акоординациа змоу аусура анагӡара иацырҵоит. Иазԥхьагәаҭаз аусмҩаԥгатәқәа реиҳарак иахьазы рынагӡара алыршоуп, урҭ раӷьырак  ахыркәшаратә стадиаҟынӡа инаӡахьеит».

Ахәҭакахьала, Аԥсны аԥыза-министр ихаҭыԥуаҩ, аекономика аминистр Кристина Озган, азакәанԥҵарақәа реишьашәалара апрограмма аҳәаақәа ирҭагӡаны ахылаԥшырҭақәа инарыгӡо аусура ипреценденттәу аҟазшьа рымоуп ҳәа инаҵшьны иазгәалҭеит. 

 «Урыстәылатәи Афедерациеи Аԥсны Аҳәынҭқарреи анорма-зинтә хырхарҭа аганахьала русеицура ҳаамҭазтәи аҭоурых аҿы мҽхакы ҭбаала аусура мҩаԥгоуп.  Ари аусура ҳҳәынҭқаррақәа рыбжьара еиҳа алҵшәа злоу аекономикатә, аинвестициатә, агуманитартә усеицура аҿиара иацхраауеит», – лҳәеит лара. Аилатәара ахыркәшамҭаз аганқәа Урыстәылеи Аԥсни рҳәынҭқарратә усбарҭақәа русура активизациа азуреи апрограмма ихадоу аусмҩаԥгатәқәа  2023 шықәса иалагӡаны  рхыркәшареи ирызкны аӡбамҭақәа рыдыркылеит.

Аҩ-ҳәынҭқаррак Рхадацәа рнапынҵақәа рыла аҳәынҭқаррақәа рзакәанԥҵарақәа реишьашәалара иазку аусура хацыркын 2021 шықәсазы. Иарбоу аамҭа иалагӡаны Урыстәылеи Аԥсни  аҩ-ҳәынҭқаррак ренергетика, ршәахтәқәҵаратә усеиҿкаара, ринвестициатәи рбанктәи усура, асоциалтә бгаԥсара, атәанчахәытә еиқәыршәара реиԥш иҟоу ихадоу аусхкқәа рҿы аусеицура аҭышәынтәалара алыршахеит.

Аилатәара иалахәын аҩтәылак иртәу аџьатә еиқәыршәара, аиустициа, адәныҟатәи аусқәа, аҩнуҵҟатәи аусқәа, агәабзиарахьчара, афинансқәа, ахәаахәҭра Рминистррақәа, Аҳазалхратә маҵзура, Урыстәыла арра-техникатә усеицуразы Афедералтә Маҵзура, Урыстәыла аекспорттәи атехникатәи хылаԥшразы Афедералтә Маҵзура, Урыстәыла Абанк уҳәа аусбарҭақәа рхаҭарнакцәа.