«Ҳаиԥылара сеигәырӷьоит. Раԥхьаӡа иргыланы ишәыдысныҳәаларц сҭахуп арыцхә хадақәа – Аԥсны Аҳәынҭқарра ахьыԥшымра азхаҵара ҟалеижьҭеи 15 шықәса аҵреи Аԥсны жәлар Рџьынџьтәылатә еибашьраҿы Аиааира агара Амши Ахьыԥшымреи.  Издыруеит, аныҳәатә усмҩаԥгатәқәа мҽхакы ҭбаала ишымҩаԥысыз, Урыстәылатәи Афедерациа ахаҭарнакцәагьы урҭ ишрылахәыз. Ҩаԥхьа иазгәасҭарц сҭахуп Аԥсны Аҳәынҭқарра ашьақәгылараҿы, аекономика, асоциалтә усхк, афымцамч уҳәа еиуеиԥшым ахырхарҭақәа рҟны ҳусеицура, жәларбжьаратәи аизыҟазаашьақәа рганахьала аусеицурагьы убрахь иналаҵаны, Аԥсны Аҳәынҭқарра ахьыԥшымра азхаҵара амҽхак  аԥхьаҟагьы иҳарҭбаалоит», -  иҳәеит Сергеи Лавров, Аслан Бжьаниа аԥсшәа иаҳәо.

Урыстәыла адәныҟаполитикатә усбарҭа ахада Аслан Бжьаниа иҭабуп ҳәа иеиҳәеит  Урыстәыла иҷыдоу арратә операциа иалахәу аибашьцәа еснагь ириҭо ацхырааразы. «Сгәы иаанагоит, иҟашәҵо адгылара Урыстәылатәи Афедерациа Ахада иқәгыларақәа рҟны иазгәеиҭо алҵшәақәа ралыршараҟны ицхыраагӡахоит ҳәа. Иахьа абарҭқәа зегьы ҳрылацәажәоит, урҭ рхыԥхьаӡараҿы аԥхьаҟатәи егьырҭ аиԥыларақәа рҟны ишьҭыххо азҵаарақәагьы налаҵаны», - ҳәа иҳәеит Сергеи Лавров.

«Ҳаиԥылара агәахәара снаҭеит. Иазгәасҭарц сҭахуп, ҳаимадарақәа қәҿиарала аҿиара ишаҿу. Урыстәылатәи Афедерациа анапхгара иҭабуп  ҳәа раҳҳәоит  Аҟәа аҳаиртә баӷәаза аиҭашьақәыргыларазы.  Ҳара ҳзы уи аҵак ду амоуп, акыршықәса раахыс ари аус азгәаҭаны иҳаман. Иҭабуп ҳәа шәасҳәоит ҩ- тәылауаҩрак рзы аиқәшаҳаҭразы.  Ари аҵак ду амоуп, ҳтәылауаагьы даара гәахәала ирыдыркылеит», -  иҳәеит Аԥсны Аҳ́әынҭқарра Ахада. Иара иазгәеиҭеит Аԥсны анапхгареи ауаажәларреи аинтеграциатә процессқәа ишрыдгыло, Урыстәылатәи Афедерациа аԥшьгарала имҩаԥысуа. «Ҳара уи ҳхы алаҳархәырц ҳҭахуп, Аԥсны атәылауаа ринтересқәа шьаҭанкыла ирықәшәоит»,-  иазгәеиҭеит Аслан Бжьаниа.

 Иара убас Аԥсны Ахада иҳәеит иҟоу аҭагылазаашьақәа рхы иархәаны Урыстәыла иҷыдоу арратә операциа адгылара шарҭо. «Асабрадақәа, ишырҳәо еиԥш, ирҿыхуп. Еилкаауп зҿы аус ҳамоу, убри аҟынтә, агәра жәгарц шәылшоит аҵыхәтәанӡа ҳашшәыдгыло», –  иҳәеит иара.

Аҳәынҭқарра Ахада Аслан Бжьаниа Урыстәылатәи Афедерациа адәныҟатәи аусқәа рминистр Сергеи Лавров «Ахьӡ-Аԥша» аорден     I аҩаӡара ианеишьеит. Урыстәыла адәныҟатәи аусқәа рминистр Сергеи Лавров «Ареспублика Аԥсны ахьыԥшымра  азхаҵареи Аԥсни Урыстәылеи рҳәынҭқаррабжьаратәи еизыҟазаашьақәа рыҿиареи рырӷәӷәареи  аус аҿы илагала ду азы» Аԥсны Аҳәынҭқарра иреиҳау аҳәынҭқарратә ҳамҭа ианашьахеит.