Ҵабыргуп, иахьа ҳтәылаҿы ари аганахьала ззанааҭ «иазҟаацәаҵәҟьоу» рацәаҩӡамзаргьы иҟоуп зҵарадырра уеигәырӷьаша амчқәа, зыбзоурала аекономикатә ҭагылазаашьа хьанҭа арзҩыдатәра алзыршаша. Ааи, урҭ апроблематә зҵаарақәа аҭыԥ рықәҵара аганахьала иҟоуп еиуеиԥшым агәаанагарақәеи азнеишьақәеи. Егьа еиԥшымзаргьы урҭ, рымҩақәҵара зҽазызкуа зегьы еилыркаауазароуп досу ишиамароу мацара акәымкәа, ҳтәыла аекономикатә уасхыр арӷәӷәараҿы иааныркыло аҭакԥхықәра ахьынӡахырҳагоу.
Ишдыру еиԥш, Аԥсны ахьыԥшымра ашьақәгылара мҩаԥысуеит адунеи аҿтәи аекономикатә кризис аҭагылазаашьа уадаҩӡақәа раамҭазы, еиҳаракгьы аҵыхәтәантәи ашықәсқәа раан. Аха, егьа ус акәзаргьы, адунеи ауаажәларра агәра дҳаргароуп ҳекономикатә ԥсҭазаара зинтә шьаҭала амҩақәҵара, хықәкыла уи иазынархоу аусқәа ԥсыцқьала напхгара рыҭара шҳалшо азы.
Аиашазы, зыхдырра аҭыԥ аҿы иҟоу дарбанызаалак агәахәара ҳарак инамҭарц залшом, ишақәнагоу, хаҳарала имҩақәҵоу, Аԥсни Урыстәылеи рыбжьара аинвестициатә, ахәҳахәҭра-економикатә усеицура ахырхарҭақәа рылҵшәақәа.
Аха, «Урыстәыла интересс иамоуп аекономика аиҭашьақәыргылареи арҿиареи рганахьала Аԥсны ацхыраара ӷәӷәа аҭара, аҩаӡарақәа зегь рҿы аимадарақәа рышьақәыргылара» ҳәа жәашықәсала ицәажәо аҳәаанхыҵтәи чынуаҩцәақәаки, урҭ ирыцзырӷызуа аҭыԥынтәиқәаки ражәалагалақәа, инҭкааҵәҟьаны ирызхәыцлатәуп. Рхаҳара аҵакы аҩаӡара ԥхьаҟатәи ҳԥеиԥш азы, ауаажәларра ииашаны иреилкаахартә еиԥш аҭагылазаашьақәа аԥҵаны, «ау дымлаҟәит, акьаҿ дзымҩаӡеит» ахшыҩҵак ахархәарала акәымкәа. Раԥхьаӡа инаргыланы урҭ рышькламҳәуазароуп ҳажәлар ршәарҭадареи рыҿиареи, «инцәыҵакшәа» маҵурауаак рзы акыр зладырҳауа хыҵхырҭақәаны мацара иҟамларц.
Ԥсабарала ҟәыӷара згым ҳажәлар ражәа иалоуп: «Аӡы иагоз "Анцәа! Анцәа!" – ҳәа дӷьаҵәыӷьаҵәуа даналага, Анцәа –Уаргьы унапқәа ҟьа, – иҳәеит» ҳәа.
Ҳәарада, аҳәынҭқарра економикала иҭышәынтәаланы аҿиара злалыршахо амзызқәа ираԥхьагылоуп, иара аҩнуҵаҟа ахатә мал арҳашьа – ашәахтәқәҵара азҵаара.
Иҳаилкаарҭазароуп, дарбан усдкылаҩзаалак акырӡа ишихьыԥшу атәыла амилаҭтә мал ашьақәгылара, аекономикатә ҭагылазаашьа ҵары ҳалҵны, аҿиара амҩа ҳаныларц азы.
Аха… ирыцҳароуп ҵабыргыхаҭаны, иахьмаҷҩым иахьа зхашәалақәа аҳәынҭқарра иацәызҵәахуа; ахәшәаратә ԥҟарақәа еилазго; «аҭыԥантәи ауаажәлар усурҭала еиқәаҳмыршәеи» ҳәа ҿыҵгас иҟаҵаны, урҭ ауалафахәы рызшәараан «аӡлагара иахылаԥшуазшәа», џьыбаҭыхла инадыркуа; мамзаргьы, ашәахтә еизгаҩцәа рџьыба ҟәрышьқәак нҭаҵо… ашәахтә закәанԥҵара адҵаҟаҵарақәа ирықәымныҟәо.
Аиеи, ус еиԥш аусқәа роуп изхылҿиаауа – акоррупциа аҿиара, «ашәшьыратә економика» ашәҭыкакаҷра, хҩы-хҩы аахаҭыԥуааи, ҩыџьа-ҩыџьа абжьгаҩцәеи ацхырааҩцәеи зыдҳәалоу аӡәырҩы аҳәынҭчынуааи, абизнес знапы алаку гәыԥҩыки, аҳәынҭбиуџьет ааха ӷәӷәа аҭауа, абажәхәац еиԥш, иахьа ҳҵызфаауа аԥсықымқымратә интересқәа рышьақәгылара.
Ас, иабанӡашьҭибахуеишь ҳгәыӷреи ҳԥеиԥши?!
Зегьы ибзиаҵәҟьаны иҳаилкаарҭоуп иахьатәи адунеи аҭагәаҭасрақәеи аиҭеиҭашәарқәеи рӡыблара ҳаламӡырц, ҳдоуҳатә хаҿра аиқәырхара шҳазхымԥадатәу. Адоуҳа еизҳазыӷьаларц, иӷәӷәазароуп, ԥсыцқьала иӡбоу хырхарҭала имҩақәҵоу аҳәынҭқарра аекономикатә хьыԥшымра.
Убри аҟнытә, досу «иаҳтәым аԥш арашәара ҳҽазкуа» акәымкәа, ҳхаҭарақәа рҟны иҳармыцхәцәаз «Сара», ишаҳцәыуадаҩугьы аганахь ҳнаханы, «Ҳара» ԥыжәара злаҳҭаша ҳҽазԥаҳшәалап. Ҳажәлар рзы, даҽа аамҭанык еиԥшымкәа, еилшәара зқәым АКЗААРА акырӡа аҵанакуеит иахьа.
Шаҟа ииашаны иҳәазеи, ауаҩра иашьаҭоу, Аламыс азышәаҳәаҩ Миха Лакрба шәышықәса раԥхьа: – Ҳара ҳазҽеихар!.. – ҳәа.
Ахра Анқәаб,
аредактор хада
