Усҟан иҭахаз аибашьцәа ргәалашәара иазкны есышықәса, Тамшь ақыҭан имҩаҧысуеит амитинг. Уи иалахәыз ашәҭқәа шьҭарҵеит абаҟа амҵан, иааҭгыланы ихырхәеит Аҧсны ахьчаҩцәа-гәымшәацәа ргәалашәара аҿаҧхьа.
Аусмҩаҧгатә иалахәын Аҧсны Ахада Аслан Бжьаниа, Ахада ихаҭыҧуаҩ Бадра Гәынба, аиҳабыра рхаҭарнакцәа, аибашьра аветеранцәа, ауаажәларра, ашколхәыҷқәа.
Анаҩс иқәгылаз аветеранцәа иргәаладыршәон ииультәи ажәылара иадҳәалаз ахҭысқәа, иара аоперациа ахаҭа шымҩаҧысуаз, ирывыршьааз рҩызцәа.
«Тамшь адесант аӡхыҵреи, уи иашьҭанеиуаз ахҭысқәеи ирыбзоуроуп ҳәа сыҧхьаӡоит анаҩс игаз аиааира ду. Иҭабуп ҳәа раҳҳәоит зыҧсадгьыл зхы ақәызҵаз, иахьа иҳамоу ахақәиҭреи аҭынч ҧсҭазаареи ҳзаазгаз. Ҳарҭ ахааназы иаҳхаҳаршҭӡом аибашьра адәаҿы иҭахаз ҳҩызцәа. Урҭ ргәалашәара хашҭра аиураны иҟаӡам» ҳәа азгәеиҭеит иқәгылараҿы Тамшь ақыҭа ахада, Леон иорден занашьоу Вадик Занҭариа. «Аҕа ирхәҭақәа рыбжьара аимадара еиҧырҟьаны, адесант рыӡхыҵра алҵшәа аиуит, уи иалнаршеит аҳҭнықалақь Аҟәа ахы ақәиҭтәра. Аоперациа ашьҭахь, ҧшьынҩажәа мшы рнаҩс иалыршан аиааира аагара. Иахьа уажәраанӡагьы арҭ аҭыҧқәа ирнубаалоит ҩажәи жәаба шықәса раҧхьа араҟа имҩаҧысуаз ахҭысқәа. Иультәи ажәылараан ханҩажәыжәиҩык аҧсадгьыл ахьчаҩцәа рхы ақәырҵеит, Аҧсны ахақәиҭра азаагара. Исымоу алшара схы иархәаны Аҧсны ахадара рыхьӡала иҭабуп ҳәа шәасҳәоит ҳветеранцәа», – абри атәы иҳәеит Аҧсны Ахада ихаҭыҧуаҩ Бадра Гәынба амитинг аҿы иқәгылараан.
Ииультәи ажәылара ахацыркра мышқәак шагыз, амшынтә десант Мрагыларатәи афронт ахь адәықәҵаразы аҽеиқәыршәарақәа ирҿын. Арратә командаҟаҵаҩцәа уахгьы-ҽынгьы аус адырулон аоперациа. Хыдҵасгьы ирыман ицәырҵырц зылшо азҵаарақәа зегьы разҧхьагәаҭареи, иахьынӡауала ҧсҭбарадеи уи амҩаҧгара. Адесант иалан хышәҩык инареиҳаны аибашьцәа, урҭ рыбжьара ирацәаҩын хатәгаҧхарала иааны еибашьуазгьы. Адесант напхгара аиҭон Аҧсны Афырхаҵа Заур Зарандиа. Аибашьцәа ирдыруан аоперациа иацыз ашәарҭара, еилкааӡамызт дара ажәылара еибганы изалҵуоу изалымҵуоу, аха гәеиҭаҧара аадырҧшуамызт, ҧхьаҟа ицон хьаҵрада. Аибашьцәа ақәгәыҕуан аҕацәа ргәырҽанӡамкәа ирыхҭыгәлоит, уи иабзоураны дара еиҳа алшарақәа роуеит ҳәа. Аха, аҭагылазаашьа даҽакала ишьақәгылеит. Ар рдесант аҧшаҳәа ианазааигәаха имшаӡацызт. Дара ӡхыҵит ақыҭақәа Тамшьи Кындыҕи рҳәааҿы. Аха, арратә техника аӡхыгара рылымшеит, аҵх зегьы аҩныҵҟа аҽазышәарақәа цон, аха ари аҭыҧ аҿы уи ҟаҵашьа амамызт.
Ашацыркаразы абаржа Тамшьтәи аҧшаҳәа инадгылеит, уаҟа дара ирзыҧшын Тамшьтәи Рекатәи аибашьцәа еидызкылоз агәыҧ. Очамчыратәи амшын баҕәаза аанкыланы изкыз аҕацәа, абџьар аӡхыгара иаҿыз ҳаибашьцәа ангәарҭа, ирықәкны ахысра иалагеит. Ҳаруаа ахьымӡаӡеит абаржа заа иақәырххьаз арратә техника аснариадқәа реиҳарак рақәхра. Адесантуаа рҽеибаркны амҩа иқәлеит амҩаду хадала. Тамшьтәи абжьаратәи ашкол аҿы ахырҕәҕәарҭа аанкыланы измаз аҕацәа рбаталион ириааины аҧсуа архәҭақәа рыҽрымардоит. Адесантуаа злаз абаталион, амҩаду еихҵәаны иааныркылоит.
Ииуль жәбанӡа ҳаибашьцәа рнапаҵаҟа иҟан жәакилометрак инарзынаҧшуа амҩадуи уи иазааигәаз аҭыҧқәеи. Аибашьра ианалага инаркны, иӡхыҵыз адесантуаа рыбзоурала, мрагыларахьтәи афронт аибашьцәа раҧхьаӡа акәны ахархәара азыруит ашьақәгыла Град. Тамшьтәи адесант аныӡхыҵ анаҩс ауп мраҭашәарахьтәи, мрагыларахьтәи афронтқәа рҟны мҽхакы ҭбаала ажәыларақәа ианрылага. Ари аоперациа аҵакы хадас иаман астратегиатә ҟазшьа змаз амҩаду аанкылареи, уи ала ақырҭуа архәҭақәа Аҟәатәи ахырхарҭахьы реибашьцәа ацхыраара рызрымҭо рыҟаҵареи. Иагьа ҧынгыла роузаргьы, урҭ зегьы ириааины аҧсадгьыл ахьчаҩцәа ирылшеит рхықәкы анагӡара.
Уи аамҭазы ииуль ҩба ауха ихацыркын Гәымсҭатәи афронт ала ажәылара. Муҳаммад Кьылба командаҟаҵаҩыс дызмаз актәи абригада аҿаҧхьа дҵаны иқәгылан афронт арҕьарахьтәи ахәҭаҿы еибашьуаз аҕа ирхәҭақәа раанкылара. Аибашьцәа рхықәкы нарыгӡеит, Гәымсҭатәи ацҳа иқәсны аӡиас армаратәи ахәҭахьы анеира рылшеит. Уи дара рнапы аҵаҟа иҟан жәибжь сааҭ рыҩныҵҟа. Ашықәсқәа, ахәрақәа зегьы аҵыхәтәанынӡа рыхәышәтәра рылшаӡом, асеиҧш аҵакы змоу арыцхәқәа ахьаа ҕәҕәа рыцуп. Ҳара зегьы иаҳуалуп иҭахаз ргәаларшәара амырӡра, уи азыҳәан зегьы ираҧхьагылоуп изызҳауа аҿар урҭ рыӡбахә рзеиҭаҳәара. Рабацәа рхы зқәырҵаз адгьыл бзиа ирбо, рыҧсадгьыл иапатриотцәа иашаны рааӡара. Убасҟан ауп иҭахаз рыҧсқәа анҭынчхо, убасҟан ауп дара рыхьӡқәа кашәара анырмоуа.
Елана Лашәриаҧҳа
