Иара еиҿкаауп Еиду Амилаҭқәа Реиҿкаара иатәу афатә аалыҵи ақыҭанхамҩеи реиҿкаара Аҟәа иҟоу рофис, «ахшхырҵәы аҟаҵараҟны аҳәса рыцхраара» иазку апроект аҳәаақәа ирҭагӡаны. Иара убас ари аофис егьырҭ афермер­цәагьы ара раалыҵ аӡыцргараҟны алшара рнаҭеит.

Аџьармыкьахь имҩахыҵыз аҭааҩцәа иаархәартә алшара рыман ашә инаҷыдангьы: аҩы, аџьынџьыхәа, акәтаҕьқәа, ашәыр рҩа, ақалмышь рҩа.

Ашә хкқәа ҳарзааҭгылозар, аҭааҩцәа иргәаҧханы иаархәон ашәеилаҵа, иара убас аџьармыкьаҿы иӡырган атрадициатә ашәхкқәа рыдагьы, акыраамҭа зеилаҵара аҭаху ашәхкқәа маҷымкәа. Усеиҧш иҟоу аалыҵқәа, ҳәара аҭахым, рыхәгьы еиҳа иҳаракуп, ҳара ҳзышьцылахьоу ашәқәа раасҭа.

Апроект аҳәаақәа ирҭагӡаны уи иалахәыз аҭыҧантәи, ҳзышьцылахьоу ашә хкқәа рыдагьы ирҵеит ашәқәа, абырзен-шәы, италиатәи ашә – каачота, македониатәи – кашкавал. Урҭ ашә-хкқәа араҟагьы ауаа иргәаҧхо, згьама алыркааз ракәхеит. Арахь дааҧхьан иара убас анутрициолог, лара аҭааҩцәа ирзеиҭалҳәеит ашә хырҳарас иалоу, ауаҩы игәабзиаразы излахәарҭоу.

Афермаҿы ашәқәа рыҟаҵашьа дырҵарадагьы, аиҿкааҩцәа урҭ рыҭираҿы ацхыраара рырҭоит. Раалыҵ аҭыҧантәи аахәаҩцәеи, адәқьанқәеи, аресторанқәеи рахь идәықәырҵоит. Аџьырмыкьаҿ, афермерцәа ирыҧшааит раалыҵ иааиҧмырҟьаӡакәа издызкылашаз аресторан, аиқәышаҳаҭрагьы рыбжьарҵеит. Ари, хымҧада, ицхыраагӡа духоит аалыҵ аизырҳаразы, аусдкылаҩ дарманшәалоит, имҩақәа арҭбаауеит.

Ажәакала, аџьармыкьа афермаҿы иҟаҵоу ашәқәа ирызкыз, ибзиоу лагамҭоуп. Ақәҿиарақәа рзеиӷьаҳшьоит уи аҧшьызгаз, зџьабаа ацу зегьы.

Наира Сабекиа