Аҧсуаа ҳџьынџьтәылатә еибашьраҿы аҵеицәа гәымшәақәа азгылеит Река ақыҭангьы. Рекаа рыҷкәынцәа аибашьцәа рыӡбахә анаҳҳәо, еснагь ҳгәалашәараҿы дыҟазаауеит Аҧсны ахьчаразы фырхаҵарыла иҭахаз, 23 шықәса зхыҵуаз Роман Шьаҭикәа-иҧа Кәартаа. Роман август 14 аҽны абџьар шьҭызхыз дыруаӡәкын, уи иҧсҭазаара аҵыхәтәантәи амш аҽнынӡа деибашьуан. Аибашьратә ҧышәагьы иман, избанзар 18 шықәса анихыҵуазгьы Афганисҭантәи аибашьрагьы далахәын, убри араҟа иҧсадгьыл гәакьаҿы аибашьра амца анакы иҩызцәа рҿы иаҳагьы агәрагара иоуит. Аха инамӡеит иара игәҭакы иҩызцәа дрылагыланы Аиааира амш аҧылара, аҕа хәымга ихы цаҳә-цаҳә игәаҵҕа ҿнаҵәеит. Роман дҭахеит, аха уи дызхьымӡаз игәҭакы – Аҧсны ахақәиҭтәра ҳара иҳалҳаршароуп ҳәа игылоуп уи иашьцәа Резои Ерики.
Иара убас еиҧш Рекаа ргәы злаҕәҕәоу аҵеицәа рацәаҩуп. Жәлантәыла абџьар кны иахьагьы-уахагьы ақырҭуа архәҭақәа ирҿагылоу иреиуоуп Қьышьмариаа, Ҳаџьымаа, Логәуаа, Ҭараа, Ҭориаа, Абшьлаа, Кәакәасқьыраа, Қәычбериаа, Нарманиаа, Шаҭ-иҧацәа, Хасиаа уҳәа убас егьырҭгьы.
Рекаа рыҷкәынцәа чарҳәарала иҳақәлаз аҕацәа рыцҳашьарада ааха рырҭоит, иҭадырхахьеит аибашьыгатә техника хкқәа: атанкқәа ҩба, БМП-қәеи БТР-қәеи ҧшьба, хыҧхьаӡара рацәала аибашьцәа.
Хацәнымырха аҕа иҿагылоу ҳаҷкәынцәа ирывагылоуп егьырҭ амилаҭқәа: ачеченцәа, аҟабардақәа, аказакцәа. Урҭ зегьы аӡәк иеиҧш агәра ганы иҟоуп аҧсуаа ҳтәы ишаго, ҳ-Аҧсынра ҧшӡа наунагӡа ахы ишақәиҭхо.
Ламара Ҳашба-Қәычбериа.
Река ақыҭа
«Аҧсны», №26.1993 ш.
