Шеварднаӡе аҧсуа жәлар ықәихырц ауп ииҭаху, уи азоуп агеноцид зымҩаҧиго, ахәыҷы, аду ҳәа еилых ҟамҵакәа ҳажәлар зҭаирхо. Аха уи игәы дажьоит, аҧсуа жәлар жәытәнатә аахыс аҭоурых ду змоу ари адгьыл иқәуп, наунагӡа иҟазаауеит.
Иаарласны шықәсык ҵуеит ҳажәлар рҵеицәа хацәнымырха, фырхаҵарыла аҕа иҿагыланы рыҧсадгьыл рыхьчоижьҭеи уи аӡәгьы ирҭаран иҟам. Шеварднаӡеи уи иҩызцәеи абри шьҭа агәра рго иалагазар ҟалап, аха ар Аҧсны ралгашьа иақәшәом.
Сара ҳқыҭаҿы, Мықә агрономс аус анызуаз еиуеиҧшым аамҭақәа раан ақырҭқәа аус ҳацыруан. Арадутәи Бахәа Бенделиани дбригадирын (ашьҭахь ақыҭа ахадас дҟалеит), Кәачаратәи Геннади Маргиани иакәзаргьы, бригадирын, Арадутәи Џьамал Бенделиани нџьныр-ргылаҩын, Цагератәи Саша Копалиани економистын.
Ақырҭуа милаҭ иреиуаз аус ҳацызуазаалакгьы гәакьак иеиҧш ҳарзыҟан, ҳаҭыр рықәаҳҵон. Уажәы Бахәеи уи иҩызцәеи рыхшарагьы нарыцҵаны рыбзарбзанқәа рыхқәа Мықәҟа ирхоуп. Еиҳарак, Мықәаа ҳчеиџьыка иааӡахьаз Арадуаа иахьа иаҳҿагыланы еибашьуеит.
Ас мацара ицарым, афашистцәа Аҧсны иқәцахап, Бахәараагьы урҭ рымҩа рымҩахап. Ҳажәлар лассы аиааира Анцәа ираҭәеишьааит.
И.Бигәаа
Мықә ақыҭа
«Аҧсны» №29. 1993 ш.
