«Иара зажәа цқьаз, зыхшыҩҵак еилыкка ауаҩы иҟынӡа изызнагоз, амцаҧшь иаҩызаз иакәын» – рҳәоит иааигәаны дыздыруаз. Даур Сарсаниа амилаҭхақәиҭратә қәҧара иазкыз аизарақәа дрылахәын, урҭ рҟны дықәгылон, Жәлар рфорум «Аидгылара» еиҿнакаауаз аусқәа зегьы ргәаны дгылан.
Амилаҭтә гвардиа анеиҿкааха иара еиҧхьхәыцрада раҧхьа уи иалалаз дреиуан. Ас еиҧш згәы цҳафыруаз аҵеи ианшәарҭаха ихы шыҧхьиамкуаз еилкаан, аҧсуа жәлар Рџьынџьтәылатә еибашьра ианалага раҧхьатәи амшқәа инадыркны иара еибашьра дцоит. Еснагь агәра игон ҳажәлар аиааира шырго, ҳҳәынҭқарра ахы ишақәиҭхо. «Ҳара иаҳмыхьчар, изыхьчода ҳаҩны, ҳаҧсадгьыл еиқәаҳмырхар – еиқәзырхода» иҳәон афырхаҵа гәымшәа.
Даур Сарсаниа далахәын аҧсуа еибашьцәа Аҟәа ахақәиҭтәразы зқьи жәшәи ҧшьынҩажәи жәаха шықәса март мзазы имҩаҧыргаз ажәылара. Март жәохә рзы излагаз ажәылараан иара аҭабиа иҭатәаз аҕацәа ахыршә рылажьны инирҵәоит, убри аан ихаҭагьы дҭахоит. Игәымшәареи ихымшаҭареи рзын, дынҭаха ашьҭахь ихҵан Аҧсны Афырхаҵа ҳәа ахьӡ ҳаракы.
Аибашьра аветеран Баҭал Ҧлиа иажәақәа рыла, Даур Заурҟан-иҧа иеиҧш зеиҧшу иахьа иҳагуп. Зыҧсҭазаара аиҳа зыҧсадгьыл иазхәыцуаз, иахӡыӡаауаз, уи аҧеиҧш ахьчаразы зхы иамеигӡоз Даур Сарсаниа Аиааира амш дшахьымӡо азы цәалашәарак иоухьан. «Сара сахьымӡаргьы шәара ишәбап зхы иақәиҭу Аҧсны ҳбираҟ шахашәыршәыруа» ҳәа иҳәалозаарын. Аибашьра анеилга ашьҭахь, афырхаҵа ихьӡ анаунагӡатәра ҳасабс иҟаҵаны, 1996 шықәсазы Даур Сарсаниа ихьӡ ахҵан дзылгаз Гәыҧтәи абжьаратәи ашкол. Есышықәса марттәи ажәылара аламҭалазы араҟа агәаларшәаратә хәылҧазы мҩаҧыргоит. Афырхаҵа игәалашәара аҳаҭыр азы сынтәагьы ашкол ахыбраҿы имҩаҧгаз ахәылҧаз иалахәын аибашьра аветеранцәа. Ашколхәыҷқәа ирыҧхьеит аибашьра иалиааз ажәеинраалақәа. Ахәылҧаз аҟны иқәгылоз ирҳәон иагьа аамҭа царгьы, аҧсуа еибашьцәа ргәымшәареи рфырхаҵареи ҿырҧшыганы ишаанхо атәы.
Гәыҧтәи абжьаратә школ аҿы агәалашәаратә хәылҧазы анхдыркәша, уи иалахәыз ашәҭқәа шьҭарҵеит иҭахаз аибашьцәа рыхьӡала игылоу абаҟа амҵан. Иара убасгьы иаҭааит афырхаҵа Даур Сарсаниа иҳаҭгәын, уаҟа ашәҭқәа шьҭаҵаны иааҭгылеит минуҭктәи аҿымҭрала.
Елана Лашәриа
