Ацәыргақәҵа аартуа, ацәыргақәҵатә зал аиҳабы Ельвира Арсалиа илҳәеит, есышықәса декабр мзазы Аҧсны асахьаҭыхыҩцәа Реидгыла ишымҩаҧнаго ацәыргақәҵа, ашықәсан  иреиҕьу аусумҭақәа ирызкны. Ас еиҧш ацәыргақәҵақәа ашықәс анҵәамҭазы имҩаҧыргоижьҭеи 21 шықәса иназынаҧшуа иҵуеит. Лара иазгәалҭеит ари аконкурс ишамоу иара ахатәы комиссиа, уи иалахуп 11-ҩык асахьаҭыхыҩцәа. Ацәыргақәҵа мҩаҧыргаанӡа иалырхуеит еиҳа еиҕьу аусумҭақәа. Ельвира Арсалиа илымаз аҭагылазаашьа лхы иархәаны илҳәеит, даара ишгәахәара дуу ашықәс иалагӡаны ацәыргақәҵатә зал хадаҟны 25 цәыргақәҵа иназынаҧшуа иахьымҩаҧгаз. Уахь иалоуп афотоҭыхымҭақәа, аиубилеитә, аҿыханҵатә цәыргақәҵақәа.

Анаҩс ажәа иман «Россотрудничество» Аҧсны напхгара азызуа Дмитри Федотов. Уи иҳәеит изныкымкәа ас еиҧш иҟоу ацәыргақәҵақәа ихы шрылаирхәхьоу. Дазгәеиҭеит лымкаала, шықәсы рацәала акерамика аус адызуло, аҟазара бзиа избо Лиудмила Будиак.  Уи лнапаҿы илиҭеит аҳаҭыртә шәҟәы.

Ельвира Арсалиа илҳәеит, ишаҧу еиҧш, ашықәсан  иреиҕьу аусумҭақәа иалкаахаз равторцәа Аҧсны акультура аминистр ишрыдиныҳәало,аха уи ацәыргақәҵа анхыркәшахо арыцхә азы оуп.

 Ацәыргақәҵаҿы ашықәс иреиҕьу аусумҭаҟны иалкаахеит ахҧатәи аҭыҧ занашьаз Виссарион Ҵәыџьба иусумҭа аҧсилаа аҟнытә «Мықәтәи аҧсуа-ақырҭуа еибашьра 1918 ш.», аҩбатәи аҭыҧ  – Руслан Габлиа иусумҭа «Золотая палитра», актәи аҭыҧ – Витали Џьениа иусумҭа «Ааҧын».

Анаҩс ажәа иман Аҧсны асахьаҭыхҩцәа Реидгыла ахантәаҩы Витали Џьениа. Уи иҳәеит есышықәса ари аҩыза аихшьааларатә цәыргақәҵа шыҟарҵо. Агәыҕра имоуп иааиуа ашықәс азы еиҳа ирацәаҩны асахьаҭыхҩцәа русумҭақәа ӡырыргап ҳәа. Ацәыргақәҵа хыркәшахоит декабр 13 азы.

С.Сақаниа