Усҟан Тамшь ақыҭан иҟаз алагарҭатә школ анаҩсан Гагратәи ашкол-интернат дҭалоит, аха хара имгакәа диасуеит (1928) Н.А.Лакоба ихьӡ зху Аҟәатәи абжьаратәи аҧсуа школ ахь. Ара аҵара аниҵоз ауп уи алитература даназҿлымҳаха. 1930ш. иҵара анхиркәша, аамҭак азы аус иуан убри ашықәсан иаартыз Аҧснытәи аҳәынҭҭыжьырҭаҿы.
Ҩеижижәабатәи ашықәсқәа раан амилаҭтә литература арҿиара иалагылаз Ш.Ҵәыџьба раҧхьатәи иажәеинраалақәа кьыҧхьын «Аҧсуа шәҟәыҩҩцәа ражәеинраалақәа» (1932ш.) ахьӡны иҭыҵыз ашәҟәы аҟны.
1932 ш. Владикавказ иҟаз Нхыҵ-Кавказтәи арҵаҩратә институт дҭалоит. Араҟа ауп иахьаҧиҵазгьы ипоемақәа «Аҟама», «Аҭаца». Ҩышықәса рышьҭахь хазы шәҟәны егьҭыҵит. 1932 ш. иҭыжьын раҧхьатәи ишәҟәы – аповест «Амаҭ зыбҕа ҧҵәоу».
1935 ш. ииун 25 рзы (ахҧатәи акурс аҟны дтәан) харада ахара идҵаны ддырбаандаҩит. 1936 ш. ииуль 29 рзы Колымаҟа дышьҭын. Аха, ега ауадаҩрақәа ихигазаргьы, аҵабырг аиааиуеит, 1953 ш. рзы иҧсадгьыл ахь ахынҳәра азин иоуит. Абасала, ҩеижәа шықәса инарзынаҧшуа игәы ззыбылуаз алитература ишиҭахыз дазхьаҧшлартә аҭагылазаашьа имоуит.
Згәабзиара акыр иҵшәааз Ш.Ҵәыџьба Аҧснытәи аҳәынҭҭыжьырҭаҿы алитературатә усзуҩы еиҳабыс аусура далагоит. Ашьҭахь, 1957 ш. март мза инаркны ажурнал «Алашара» аҭакзыҧхықәу амаӡаныҟәгаҩыс дыҟан, нас Аҧсны ашәҟәыҩҩцәа Реидгыла алитературатә консультантс диасуеит. Есааира алитература иҽагәылеихалон.
Ирҿиамҭақәа ркьыҧхьуан ажурналқәа: «Алашара», «Амцабз», агазеҭқәа «Аҧсны ҟаҧшь», «Советская Абхазия», иара убас иажәеинраалақәа агәылалеит «Аҧсуа поезиа антологиа» (урысшәала, Москва, 1958), ашәҟәы «Сухумские мотивы» (2500-летию Сухума посвящается)» (М.,2005 ) уҳәа рҟны. Ш.Ҵәыџьба егьырҭ иажәеинраалақәа рыхәҭак анылеит «Аҧсуа поезиа антологиа. XХ ашә. (Аҟәа – Москва, 2001, аиҭаҭыжьра – Аҟәа – 2009).
Иҩымҭақәа рҭыжьра ҩаҧхьа ихацыркын дандыриаша ашьҭахь. 1950-тәи ашықәсқәа рҽеиҩшамҭа инаркны 15 инареиҳаны иажәеинраалақәеи, ипоемақәеи, иажәабжьқәеи, иповестқәеи реизгақәа ҭыжьын.
Ш. Ҵәыџьба иҩымҭақәа ирылыркаартә ишәҟәы «Маҿа-маҿа» (апоетикатә миниатиурақәа ржанр иаҵанакуа).
Апоет дазхьаҧшуеит иара убас ахәыҷқәа ирызкыз аҩымҭақәа, 1955 ш. рзы иҭыжьын ахәыҷқәа ирызку иажәеинраалақәа реизга «Аҧшәма хәыҷы». Иаарласны акьыҧхь абеит аҧхьаҩцәа хәыҷқәа ҳамҭас ироуз ашәҟәы «Абаҳча ссир». Ахәыҷқәа рдунеихәаҧшра ианаало ажәабжьқәагьы аҧиҵо далагеит, урҭ иреиуоуп: «Абду Шьаҳан», «Ахьча-ла Вулкан», «Ажәкамбашь Бача», Амшә», «Абнакәты ҕраҷкәын», «Арашьқәа рдәы» уҳәа егьырҭгьы.
Ахәыҷқәа ирзикыз апоезиатәи апрозатәи рҿиамҭақәа рҟны аҧхьаҩ игәникылартә иааирҧшуеит Аҧсадгьыл ахь абзиабара, уи аҧшӡара, ашәаҧыџьаҧ, еиуеиҧшым ашәыр-хкқәа, абаҳчақәа, адәқәа, ахәқәа уҳәа.
Ш.Ҵәыџьба иҩымҭақәа еиҭагоуп аурыс, ақырҭуа уҳәа абызшәақәа рахь.
Жәохә инареиҳаны аҧсышәала ишәҟәқәа ҭыжьын иалкаақәоугьы налаҵаны, иара убас Москва иҭыҵит аурысшәахь аиҭагақәа: «Чудесный сад» (1961); «Сказочный поезд» (Стихи и поэма, 1969); «Долина крылатых коней» (Рассказы дедушки Шахана. Для младшего возраста, 1971); «Персиковая косточка» (Новые стихи, 1979); «Талисман (Стихи и поэмы, 1984); «Стихи и поэмы» (1988).
В.Ажәанба
