Арҭ амшқәа рзы аԥсадгьыл ахь ахынҳәразы Аҳәынҭқарратә еилакы акттә зал аҟны имҩаԥган афильм «Аԥсны аҭоурых» аӡыргара. Арахь иааит уи аҭыжьраҿы ацхыраара ҟазҵаз арежиссиорцәа , аҭоурыхдырыҩцәа, амассатә хархәагақәа рмаҵзуцәа, аҿар.
Иааидкыланы афильм кьаҿ ианырԥшуп аԥсуа жәлар ҳҭоурых, ҳкультура, ҳазнысыз амҩа лакьҭа. Афильм шоуп х-хәҭакны, сааҭбжак иреиҳамкәа ицо афильм иузаанартуеит аԥсуаа ҳҭоурых. «Иара аԥҵаразы даара ҳаԥшын, ҳаизыԥшын аспонсор акраамҭа, – иҳәоит арежиссиор қәыԥш Дауҭ Логәуа. – Зынӡа 7 шықәса инархылеит асеиԥш аҭыхымҭа аԥҵара аидеиа ҳамеижьҭеи, убри ҳагәҭакы анагӡараҿы иҳацхрааит, иагьрыбзоуроуп Адунеизегьтәи аԥсуа- абаза конгресс», – азгәеиҭеит иара.

Афильм «Аԥсны аҭоурых» аӡыргара иазкыз аиԥылара аартуа аԥсадгьыл ахь ахынҳәразы Аҳәынҭқарратә еилакы аиҳабы Басҭаҟәа Агрба иқәгылараҿ иҳәеит, ари аҿар рзы акрызҵазкуа проектны ишыҟалаз, насгьы асоциалтә ҳақәа зхы иазырхәо зегьы ҳтәыла аҭоурых шырзаанартуа. Убри инаҷыдангьы атәыла анҭыҵ инхо ҳдиаспора рҟынӡагьы цҳаҵас ишҳабжьало. Избанзар ари афильм х-бызшәак рыла иҭыхуп – аԥсшәа, аурысшәа, англыз бызшәа.
Афильм аԥҵараҿы рхы иадырхәеит Аԥсны аҭоурых иазку арҵага шәҟәы. Зегь реиҳа иалкаатәу хәҭоуп аҩбатәи ахәҭа. Уи аҭыхра аан адгылара риҭеит аҭоурыхтә ҭҵаарадыррақәа ркандидат Џьамбул Инџьгьиа. Афильм амузыкатә композициала еиқәиршәеит акомпозитор Анри Гәынба.
Ахԥатәи ахәҭа анаԥырҵоз рхы иадырхәеит аинтернет , архивтә материалқәа.

Адунеизегьтәи аԥсуа- абаза конгресс Аҟәатәи аҟәша аиҳабы Дмитри Ажьибеи уи алахәыла Инна Барчани рықәгылараҿы иазгәарҭеит афильм қәҿиарала иаԥҵахаз лагамҭоуп ҳәа. Избанзар уи иаҳнаҭоит ҳҭоурых еиҭах азхәыцра, ­хәыц-хәыцла ҳнысымҩа аҭҵааразы алшарақәа. Ҳажәлар ирбап, иахцәажәап. Ирҳәоит: «Аимак- аиҿак ахьыҟоу ииуеит аиаша» ҳәа . Иаарласны ателехәаԥшрала иддырбараны иҟоуп зыжәлар рҭоурых иазҿлымҳау, еснагь здыррақәа еихазҳауа, еснагь иԥшаауа ҳҟазацәа иаԥырҵаз афильм ҿыц «Аԥсны аҭоурых». Мышьҭыбзиала! Ицәырҵлааит убас еснагь аидеиа ҿыцқәа!

Наира Сабекиа