Аҟәатәи амузыкатә ҵараиурҭаҿы ишьақәгылаз лыбжьы – Аԥсни адунеи аҿы иреиҳаӡоу атеатрқәеи рзы музыкатә цҳаны иҟалеит. Хышықәса ирылагӡаны «Геликон-опера» аҟны Алиса Гыцба иаалырԥшит итрагедиатәызи зымҽхак дузи ахаҿсахьақәа – Џь. Верди и-Аидеи и-Виолеттеи инадыркны П.И. Чаиковски и-Лизеи и-Татьианеи рҟынӡа, урҭ рынгӡашьа угәаҵанӡа инеиуеит, акы иалаҩашьом.

Алиса Гыцба еснагь дыҟан дагьыҟазаауеит лыԥсадгьыл азы культуратә цҳаражәҳәаҩны. Уи ареспублика аҿиараҿы ллагала есшықәса еиҳа-еиҳа амҽхак ҭбаахоит. Иаԥылҵаз Жәларбжьаратәи аицлабра-лабораториа «Амузыка ҳәаа змам еицәажәароуп» аҟыбаҩ злоу аҿар рзы акырӡа зҵазкуа платформаны иҟалахьеит.

Аԥсныпресс амаҵзура Алиса Шьалуа-иԥҳа гәык-ԥсык ала лымшира лыдырныҳәалоит! Лырҿиаратә мцабз лашалааит, лроль ҿыцқәа ақәҿиара рыцзааит, «Геликон-опера» аҭыӡқәа рҟны еиԥш, лыԥсадгьыл аҿгьы лыбжьы хаа иаԥшаалааит азыӡырҩцәа. Ҵҩа змам агәабзиареи агәамчи!