Аредактор хада: Ахра Анқәаб
Аҭел: 26-15-94 Адкыларҭа: 226-15-75
Аелектронтә адрес: apsnygazeta@mail.ru
Агазеҭ шьаҭаркуп 1919 ш. февраль 27 азы.
«Апснымедиа» адиректор хада: Џьопуа Р.Р.
Аҭел: +7 (840) 226-89-89
Аелектронтә адрес: apsnymedia@gmail.com
Аԥсны ашәҟәыҩҩцәа Реидгыла Амилаҭтә библиотека аҟны еиҿнакааит апоет, апублицист, ауаажәларратә усзуҩы Виачеслав Ҷыҭанаа диижьҭеи 70 шықәса аҵра иазкыз аиубилеитә хәылԥазы «Арҩаш кнаҳа абжьы».
Агәалашәара ахәылҭаз ахь имҩахыҵит, аԥсуа шәҟәыҩҩцәа реиԥш, аҵарауаа, акультуреи аҟазареи русзуҩцәа, аҵара-ааӡара знапы алаку арҵаҩцәа, апоет иҩызцәа, иҭынхацәа, иҭаацәара, алитература абзиабаҩцәа аӡәырҩы.
Аекран аҟны иддырбон еиуеиԥшым ашықәсқәа раан иҭыхыз апоет ифотосахьақәа, иажәеинраалақәа дахьрыԥхьо, иара убас иҿцәажәарақәа рвидеонҵамҭақәа рҟынтәи ацыԥҵәахақәа.
Ахәылԥаз ааиртит, В. Ҷыҭанаа иԥсҭазаареи ирҿиаратә мҩеи дырзааҭгылеит Аԥсны ашәҟәыҩҩцәа Реидгыла ахантәаҩы Вахтанг Аԥҳазоу. Анаҩс ргәалашәарақәа рыла иқәгылеит: апоет, ауаажәларратә усзуҩы, ажурнал «Аԥсны аҟалара» аредактор хада Геннади Аламиа, ажурнал «Алашара» аредактор хада Анатоли Лагәлаа, Аԥсны ашәҟәыҩҩцәа Рассоциациа ахантәаҩы Владимир Занҭариа, ашәҟәыҩҩы Даур Наҷҟьебиа, апоет Гәында Кәыҵниа, ажурнал «Амцабз» аредактор хада Гәында Сақаниа, академик Валентин Кәаӷәаниа, апоет иҩызцәа гәакьақәа ируаӡәку Феликс Џьынџьиа уҳәа егьырҭгьы.
Ахәылԥаз аҵакы еиҳагьы иханарҭәаауан иныбжьаршә-аабжьаршәны Аҟәатәи ашколхәыҷқәеи Аԥснытәи Аҳәынҭуниверситет астудентцәеи В. Ҷыҭанаа иажәеинраалақәа исахьаркны иахьрыԥхьоз.
Аҵыхәтәан апоет иашьа, аҵарауаҩ Савели Ҷыҭанаа, иара убас иԥшәмаԥҳәыс Нонна Делба-Ҷыҭанаа ахәылԥаз аиҿкаара аԥшьызгаз, иахаҵгылаз, уи зҽалазырхәыз зегьы иҭабуп ҳәа рарҳәеит.