Бзыԥ аҳабла
Аҳәынҭқарра Ахада иусуратә ныҟәара хацыркын Бзыԥ аҳабла абжьаратәи ашкол №1 аҭаарала, араҟа имҩаԥысит аспорттә зал ҿыц аартра иазку аныҳәатә усмҩаԥгатә. Аспор­ттә зал ҿыц дыргылеит Гагра араион Ахадара ахарџь ала. Уажәы ашкол аҿы аҵара рҵоит 518-ҩык ахәыҷқәа.
Аспорттә зал ҿыц аартра иазкыз аныҳәатә церемониа рхы аладырхәит аҵара аминистр Хана Гәынԥҳа, араион ахада Иури Ҳагәышь, Жәлар Реизара-Аапарламент адепутатцәа Алхас Барцыци Ҭемыр Беиеи. Еизаз рҿаԥхьа дықәгыло, Аҳәынҭқарра Ахада аспорти абаҩарҵәыреи рырҿиара еиҵагыло аҿар рааӡараҿы иамоу аҵакы инаҵшьны иазгәеиҭеит. Бадра Гәынба аԥхьаҟатәи абиԥарақәа рааӡара иаҿу арҵаҩцәа иҭабуп ҳәа реиҳәеит, иара убас аспорттә обиектқәа реиҭашьақәыргылареи рыргылареи рҿы араион Администрациа алшамҭақәа азгәеиҭеит. Аҵара аминистр Гәынба Хана илҳәеит аҵаҩцәа ганрацәала рыҿиаразы аспортзал ҿыц аартра акрызҵазкуа шьаҿаны ишыҟоу. Анаҩс Ахада даҭааит ашкол ахыбраҟны иҟоу Бзыԥ ақыҭа иалҵыз, иҭахаз Аԥсадгьыл ахьчаҩцәа ирызку амузеи. Аҳәынҭқарра Ахада иара убас актәи акласс аҵаҩцәеи иареи еицәажәеит.
Ақалақь Пицунда
Аҳәынҭқарра Ахада Пицунда ақалақь аҿы аа-шықәса иреиҳаны ирзхмыркәшац ахәыҷбаҳча арҽеиратә усурақәа дырццакырц анапынҵа ҟаиҵеит. Ахәыҷбаҳча аиҭашьақәыргылара мҩаԥнагоит Амуниципалтә Унитартә Наплакы «Ақалақь Аргылара-­еиҭашьақәыргыларатә Еҿкаара. Аҵара аминистр Хана Гәынба иарбоу аобиект азхиара гәазҭо, анаҩс уи ахархәарахь аҭаразы аӡбамҭа здызкыло аусуратә комиссиа аԥҵара азы анапынҵа лиҭеит. Иара убас Аҳәынҭқарра Ахада аштаттә еихшанҵа аус адулареи ахәыҷбаҳча аперсонал ала аиқәыршәареи рзы анапынҵа ҟаиҵеит. Араиони ақалақьи Рхадарақәа иарбоу аобиект ахьчареи иааиуа ашықәс азы аартра алыршарази анапынҵа роуит. Анаҩс, Бадра Гәынба иара убас аспорттә комплекс аргылареи Акультура аҩны арҽеиреи ахьымҩаԥысуа аҭыԥқәа гәеиҭеит. Апроект аҳәаақәа ирҭагӡаны иазԥхьагәаҭоуп еиуеиԥшым аспорттә хкқәа рзы азыҟаҵаратә залқәа, аицлабрақәа рымҩаԥгаразы адәмаҷқәа, абассеин. Убасгьы иазԥхьагәаҭоуп – аицлабрақәа ирылахәхо ахьаангыло апансион аартраз ахыбра аиҭашьақәыргылара.

Аҳәынҭқарра Ахада инаҵшьны иазгәеиҭеит, ари зымҽхак ҭбаау, убри аан атәылазы акыр аҵак ду змоу апроект анагӡаразы Аԥсны анапхгара Гагра араион ацхыраара шанаҭо, ахарџь ахәҭак ахахьы ишаго. «Ас еиԥш иажәхьоу ахыбрақәа ҳақалақь ԥшӡа Пицунда агәҭаны аҟазаара ахәҭам. Ара иҟазароуп ахәыҷқәеи ақалақь ауааԥсыреи рҽахьазыҟарҵало аспорттә центр», — иҳәеит Ахада.
Анаҩс Аҳәынҭқарра Ахада Пицундатәи акультура Аҩны аҟны имҩаԥысуа аиҭшьақәыргыларатә усурақәа дырҭааит. Аусбарҭа адиректор, Аԥсны зҽаԥсазтәыз артист Ҭемыр Агрба 22 шықәса раԥхьа иҟалаз абылра ашьҭахь, ари ахыбра маҷ-маҷ аилабгара иаҿын, уи аиҭашьақәыргылара алымшо шьаҭанкыла еилабгар ауан иҳәеит. Аха араион ахада Иури Ҳагәышь ибзоурала акультура Аҩны аԥсҭазаара ҿыц аиуит. Аиҭашьақәыргылара мҩаԥысуеит араион абиуџьет ахарџь ала. Уажәазы еиҭашьақәыргылоуп афоие, агримиортә уадақәа, абиблиотека, аамҭа кьаҿк иалагӡаны асценеи азали реиҭашьақәыргылара нападыркуеит.
Аҳәынҭқарра Ахада акурорттә қалақь азы акырӡа аанагоит ҳаамҭа иақәшәо акультура Аҩны аҟазаара, араҟа рҽазыҟарҵалар рылшоит ахәыҷқәа, идырбалахоит афильмқәа, иара убас имҩаԥыслоит аиԥыларақәеи аизарақәеи ҳәа инаҵшьны иазгәеиҭеит. Аусурақәа зегьы рхаҭабзиара ҳаракны, насгьы иазоужьу аҽҳәарақәа инарықәыршәаны анагӡаразы абжьгарақәа ҟаиҵеит.
Ақыҭа Лӡаа
Убасгьы, Аҳәынҭқарра Ахада Лӡаа ақыҭа даҭааит, араҟа уи акультура Аҩны аргылара шымҩаԥысуа гәеиҭеит. Ахыбра ҿыц ргылахоит ажәытә хыбра аҭыԥан. Аусурақәа хыркәшахароуп 2026-тәи ашықәс анҵәамҭазы. Аҳәынҭқарра Ахада ақыҭақәа рҿы акультура Аҩнқәа рыргылара аҵак ду шамоу азгәеиҭет. Уи иажәақәа рыла, араҟа ахәыҷқәа жәлар рыкәашарақәа, рашәаҳәара, амилаҭтә инструментқәа рҵара рҽазыркыр алшоит, уи зегьы ааизакны амилаҭтә культура аиқәырхара иацхраауеит. Уантә Бадра Зураб-иԥа Лӡаа ақыҭа школ даҭааит. Уи арҵаҩцәеи аҵаҩцәеи, иара убас актәи акласс ахь зшьаҿа еихызгаз ахәыҷқәа дрыҿцәажәеит. «Бзиала ижәбала шәхатәы бызшәа, ишәҵала, уи даараӡа акыр аанагоит»,— иҳәеит ахәыҷқәа рахь ихы рханы Аҳәынҭқарра Ахада.
Аҳәынҭқарра Ахада иарҳәеит, сынтәа ашкол ахыб аиҭашьақәыргылареи адәахьтәи арԥшӡареи шазԥхьагәаҭоу, анаҩс аҩныҵҟатәи аҩычаратә усурақәа ишрылаго. Бадра Гәынба араион ахадареи аргылаҩцәеи рахь ихы нарханы иазԥхьагәаҭоу аусурақәа зегьы ахаҭабзиара акыр иацклаԥшырц азы анапынҵа ҟаиҵеит. «Араҟа ҳхәыҷқәа аҵара рҵоит, инагӡахо аусурақәа рхаҭабзиара иадҳәалахоит урҭ анаҩс рҵаратә процесс аманшәалареи ашәарҭадареи», — иҳәеит Аҳәынҭқарра Ахада.
Ақалақь Гагра
Гагра ақалақь аҿы Аҳәынҭқарра Ахада даҭааит араионтә Санитар-­епидемиологиатә Станциа ахыбра ҿыц. Уаанӡа ари аусбарҭа аусуразы иманшәаламыз, аилабгара иаҿыз ахыбраҿы иҟан. Шьаҭанкыла аиҭашьақәыргылара ашьҭахь уи рҿыцын: амаҵуратә кабинетқәа рхиан, ахимиатәи абактериологиатәи алабараториақәа аартын. Аусбарҭа аҿы аӡы анализ мҩаԥыргоит, афатә аалыҵқәа гәарҭоит, иара убас аҿыкчымазарақәа рдиагностика ҟарҵоит, убас ала есышықәса зқьҩык инареиҳаны ауаа ацхыраара рырҭоит. Убасгьы Аҳәынҭқарра Ахада Абазгаа рымҩаҿы зеиҭашьақәыргылара иаҿу ахәыҷбаҳча даҭааит. Ари ахәыҷбаҳча ахыбра Гагра араион Ахадара абаланс ахь ирхынҳәын, уажәы уи араион ахарџь ала еиҭашьақәдыргылоит. Аусурақәа ахыркәшарахь инеиуеит. 100-ҩык рҟынӡа ахәыҷқәа здызкылар зылшо ари ахәыҷбаҳча ахәыҟаҵарҭазы амаругақәеи егьырҭ аиқәыршәагақәеи рыла архиара мҩаԥысуеит. Аҳәынҭқарра Ахада Ашықәс Ҿыц аламҭалазы аусурақәа хдыркәшарц азы адҵа ҟаиҵеит.
Аҳәынҭқарра Ахада асоциалтә ҵакы змоу аобиектқәа реиҭа­шь­ақәыргылара зхы алазырхәуа зегьы иҭабуп ҳәа реиҳәеит, уи Гагра араион ахада хаҭала аусурақәа ахылаԥшра аиҭаларц анапынҵа ииҭеит...