Сара Владислав Арӡынба ихьӡ анс­аҳауа сыбла даахгылоит жәл­арык раԥхьагыла, аԥсҭазаара ацәқәырԥақәа жәпакы ирылсыз, зыжәлар рхьаа зхьааз ауаҩы лаша.
Аԥсны жәлар ҳҭоурых аҿы Владислав Григори-иԥа Арӡынба ихьӡ хьтәы нбанла иҩуп уи иажәагьы ԥсра ақәым. Владислав иԥсадгьыли ижәлари дрыхӡыӡаауан, иара убас уи дахӡыӡаауан аԥсуа бызшәа. Иара аԥсшәа иазкны иҳәон «Аԥсуа бызшәа ҟамлар, аԥсуа литература ҟамлар, аԥеиԥш амамзар, нас аԥсуа ҳәанҭқаррагьы аԥеиԥш амаӡам. Аԥсуа ҳәынҭқарреи аԥсуа бызшәеи рԥеиԥш еидгылоуп, еибаркуп. Аԥсуа бызшәа аԥеиԥш амазар, аԥсуа ҳәынҭқаррагьы иамоуп, абызшәа иамамзар аҳәынҭқаррагьы иамаӡам. Ус ауп сшахәаԥшуа» – ҳәа. Ҳаԥсуара иузаҟәымҭхо иадҳәалоуп ҳбызшәа. Иарала ицәажәоит ҳдунеи. Владислав иажәақәа рҵакы ҵаулоуп, дара ҳбызшәа иагәылаку адоуҳамч аадырԥшуеит.
Жәлар раԥхьагыла Владислав Арӡынба ихшыҩи, иҟазареи ихәыцра ҷыдеи ҳауаажәлар анырра ду рнаҭеит. Ирҳәалоит ажәлар ашәарҭара ианҭагылоу ргәы зырӷәӷәаша, изықәгәыӷша, мчрак рызҭаша аӡә далихуеит ҳәа Анцәа, ииашаҵәҟьангьы ус иҟалеит. Ажәлар зықәгәыӷша, рыԥсҭазаара еиӷьызтәыша уаҩны даацәырҵит Владислав Григори-иԥа Арӡынба. Уи арҵабыргуеит ақырҭуа-аԥсуа еибашьраан иааирԥшыз агәымшәара, ахшыҩ ҟәыӷара.
Ус имариамызт усҟантәи аам­ҭазы иҟаз аҭагылазаашьа. Уи ижәлар рҿаԥхьа, иԥсадгьыл азы идыз аҭ­акԥхықәра ҳаракын, иара илиршеит идыз иуалԥшьа анагӡара. Еилыкка иаҳбарҭахеит зыӡбара уадаҩыз аусқәа, лҵшәа бзиала дазнеины аҭыԥ ақәҵара шилшоз. Ижәлар гәакьа дрызгәдуа лассы-лассы иҳәалон: «Сара сгәанала, адунеи аҿы жәларык рыԥшаара уадаҩзар ҟалап, аԥсуаа реиԥш ажәлари аԥсадгьыли рлахьынҵа иазхәыцуа, иахӡыӡаауа. Уи џьашьатәым, избанзар аҟазаареи аҟамзаареи рызҵаатәы аԥсуаа ҳаиԥш даҽа жәларык рҿаԥхьа аҭоурых абас иҵарны иқәнамыргылацт. Ус баша машәыршақә иҟамлазар ҟалап, ҩыџьа ахьааидтәало, раԥхьа иааныркыло аныҳәаҿа ажәлари аԥсадгьыли иахьрызкугьы» – ҳәа.
Ҵоуп, зқьы шықәсқәа инареиҳаны изхыҵуа, ауаатәыҩса рҭоурых аҿы зхылҵшьҭрақәа ргәалашәараҿы ашьаҭа ҵаула аанзыжьыз ауаатәыҩса рхыԥхьаӡара рацәоуп. Ажәларқәа жәпакы беиоуп, насыԥ рымоуп ҳҳәар ҳалшоит ахаҭарнакцәа аԥхьагылаҩцәа нагақәа, зыжәлар рҿахәы зҳәо ауаа змоу. Урҭ рхыԥхьаӡараҿы дыҟоуп Владислав Григори-иԥа Арӡынбагьы. Иара инапы злакыз аусқәа рҿы иааирԥшуан иналукааша адипломатиатә ҟазшьақәа.
Иџьашьатәым Владислав Арӡынба Аԥсны аҭоурых аҿы, иара убас Аԥсны анҭыҵгьы иналукааша фырхаҵа ӷәӷәаны, даԥхьагылаҩны ҳҭоурых адаҟьақәа дахьырну. Уи ихьӡ иузаҟәымҭхо иадҳәалоуп Аԥсны аҭоурых азы ихадоу ҳажәлар рхақәиҭреи рхьаԥшымреи. Владислав Григори-иԥа Арӡынба зеиԥшыҟам адоуҳамч змаз, дырра ҵаулала ибеиаз, Аԥсны ԥхьаҟатәи аԥеиԥш азы агәрагара змаз уаҩын.
Сара Владислав Григори-иԥа Арӡынба раԥхьаӡа ихьӡ ахьсаҳаз сыҩнаҭаҿы ауп. Еиҳа инарҭбааны уи иҭоурыхи, инысмҩеи ҳазааҭгылон ашкол аҿы. Уаҟа раԥхьаӡа иҭоурыхи ихаҭареи иаҳзалацәажәаз дреиуоуп Гәыԥтәи абжьаратә школ арҵаҩы Чачхалиа Мадина Славик-иԥҳа. Уи убриаҟара дихӡыӡааны иӡбахә шаҳзеиҭалҳәоз ала аинтерес скит, иара инысмҩа еиҳа инарҵауланы иҭысҵаандаз, ифотосахьақәа срыхәаԥшындаз ҳәа. Уи аҽны аҩны санааи сҭаацәа срыҳәеит ифотосахьақәа сзырыԥшаарц. Аиашазы раԥхьаӡа Владислав Арӡынба ифотосахьа снапаҿы ианаазга, уи асахьа ҳарҵаҩы иаҳзеиҭалҳәоз зегьы ҵабыргыҵәҟьаны ианыԥшит. Иблақәа санырхыԥшыла амра ашәахәақәа шалыԥхоз рнызбаалеит.
«Жәлар рыбзиабара ҟьалан иааӡом, иалнахыз далнахит, иаԥсам дабаӡом» – ҳәа иҩуан Жәлар рпоет Баграт Шьынқәба. Арҭ ажәақәа сара Владислав Григори-иԥа Арӡынба идысҳәалоит. Ҳара аҿар иаҳуалуп Владислав инысымҩа азхьаԥшра, иҿырԥшала ашьаҿеихгалара еснагь.

Анжела Хведелиӡе,
афилолгиатә факультет
«аԥсуа бызшәеи алитературеи» азанааҭ, 3-тәи акурс астудент