Ари аҽны, аԥсуаа ҳҵасқәа инарықәыршәаны иазгәарҭоит иԥсхьоу ргәалашәара амшныҳәа. Еиҳараӡакгьы абжьыуаа, ҩнаҭацыԥхьаӡа аишәа дыргылоит. Ари аҽны аԥсцәа аҩны иаҭааны иҟоуп ҳәа иршьоит. Астол ашҟа инаргоит аҿа-маҿа. Шьоукы ацәашьқәа адыркуеит, даҽа шьоукы асыкәмал хырҵоит.
Нанҳәа аҽны, астол инаханы аҩнашә аԥхьа идыргылоит, аҭаацәа реиҳабы астол днадгыланы амаҵ иуеит. Зегьы реиҳа исабаԥуп ҳәа иԥхьаӡоуп ацха змоу ачыс аишәа ақәҵар, аҳалуа ҟарҵоит.
Аишәа гыланаҵы убжьы рдуны ацәажәара ҟалом, иара убас аҩны аҩналара, адәылҵра. Аишәа иқәу ачыс ахылҩа-ԥсылҩа анцалак, аишәа зыргыло афатәқәа аҳәызба рылишьуеит, арыжәтә ҭаиҭәоит. Анаҩс, иқәу ачыс зегьы агьама ибоит, аҵәца иҭаиҭәаз аҩы, аӡы зҳәаз еиԥш адәныҟа инкеиҭәоит «аԥсы ҳәа акрыҟазар, шәыԥсы ҭынчыз, шәышьҭахьҟа шәхьамԥшын» ҳәа наҳәаны.
Ажәытәан, иара иахьагьы иҟазҵо рацәаҩуп, уаҵәы Нанҳәан иахьа еиԥш, ахәылбыҽха, аҭаацәа реиҳабы аҭәа иманы агәашә аԥхьа инаганы ишьҭаиҵоит. Аҭаацәа зегьы рнапы ианиԥсалоит аџьыкхыш, цәа хәыҷык налаҵаны. Нас дныҳәа-ныԥхьаны, аҩысҭаа даҳҟәыблааз ҳәа наҳәаны, аҭәа иааигаз амца нацраҵаны, ирку аарымхны амца инақәиԥсоит. Хәыҷгьы дугьы убри ашьҭахь амца иахыԥоит. Амца аҿыцәаара ианалагалаг, лабак аашьҭыхны, хынтә иасуеит.
Ақьырсиан динхаҵара аҟны ари аныҳәа азгәаҭара зызку Анцәа Иан лыԥсҭазаара лалҵреи анышә ламадареи рзы адырраҭара иашаны ишьақәыргылаӡам. Ауахәаматә дин ҵара атекстқәа реиҳарак рыҟны иаагоуп абас иҟоу асиужет: Иаса Қьырса жәҩан ахь ихалара анаҩс, зегь реиҳа иԥшьоу Анцәа Иан Аҭыԥҳа Мариа зны Ефес дыҟан, нас лыԥсҭазаара аҵыхәтәантәи ашықәсқәа рзы Иерусалимҟа диасит, ацқьа цҳаражәҳәаҩ Иоан дагьылхылаԥшуан. Ус уасиаҭ ажәаны изаанижьхьан иара Анцәа, иан гәакьа леиԥшҵәҟьа ахылаԥшра лиҭаларц азы. Лԥеи Лареи реиԥылара дазыԥшны, лара есымша Голгофа аҳаракыраҿы дныҳәон. Аҭыԥҳа Мариа лыԥсҭазаара лалҵра хымш шыбжьаз, аԥаимбар Гавриил дылҭаан, лассы лыԥха змоу алацәеиқәыԥсарахь дшиасуа атәы леиҳәеит. Ацқьа Мариа лзы ари лыԥха змоу жәабжьны иҟалеит. Лара ацҳаражәҳәаҩцәа зегьы аалыԥхьеит, лцара атәы ралҳәарц азы. Анцәа дзыхшаз лҳәатәала лцәеижь Иерусалим азааигәара, Гефсиманиа, лани лаби рнышәынҭрақәа рыбжьара анышә иамадан. Хымш рышьҭахь анышәынҭраҟны дааит ацҳаражәҳәаҩ Фома, иара лыԥсҭазаара даналҵ аҽны дыҟамызт азы, аха Ацқьа Мариа лцәеижь аҭыԥан адамраҟны ашәҭқәа ҭаԥсаны ибеит.
Иџьашьахәны иҟалеит Ацқьа Мариа аҵыхәтәантәи лымҩахь лынаскьагара азы адунеи ахи-аҵыхәеи рҟынтәи аара ахьрылшаз 12-ҩык ацҳаражәҳәаҩцәа зегьы. Ауахәаматә ҵарақәа изларҳәо ала, Иаса Қьырса Иан лыԥсы цқьа ажә­ҩанахь ишьҭихит. Ари амш азы лара лылацәа ааиқәылыԥсеит ауп, жәҩан­гәашәԥхьара абареи насыԥла иҭәу, ҵыхәаԥҵәара змам аԥсҭазаара азы иаразнак ала дааԥшырц, хымш рышьҭахь инаӡаӡоу ацәеижь лыманы инаӡаӡоу, насыԥла иҭәу анхарҭаҿы дынхарц азы. Иара убри ауха Ацқьа Мариа аԥааимбарцәа лыцны ацҳаражәҳәаҩцәа рҿаԥхьа дцәырҵит, абасгьы лҳәеит: «Шәгәырӷьала! Сара есымша сшәыцзаауеит, Анцәа иҿаԥхьагьы шәара шәзы сныҳәаҩуп аринахысгьы».
Анцәа дзыхшаз Ацқьа Мариа Лылацәеиқәыԥсара Амш азгәаҭара инамаданы, аныхабаақәа зегьы рҿы ашьыжь, асааҭ 8.00 рзы аныҳәатә литургиа мҩаԥысуеит.

Шарида Торчуа