Аҭыжьымҭа иагәылоу еиуеиԥшым асатиақәа иреиуоуп: Алықьса Гогәуа – «Зыԥсҭазаарагьы, зусгьы, зыԥсрагьы жәлар рҭоурых иатәу», Борис Гәыргәылиа – «Ҿыцәаара зқәым амцабз», Аполлон Думаа – «Владислав Арӡынба диижьҭеи 80 шықәса аҵреи ҳусеицуреи иазку гәалашәарақәак (хҭысқәак)», Ҭали Џьапуаԥҳа – «Владислав Арӡынба иҿцәажәара», Ахра Анқәаб – «Жәлар рԥыза ихьӡынҩылоу апоезиатә рҿиамҭақәа».
«Владислав ибзарӡы» арубрикаҿы еизгоуп: Владимир Агрба, Виссарион Ҵәыџьба, Аполлон Шьынқәба, Оқҭаи Чкотуа, Гиви Агрба Аԥсны Раԥхьатәи Ахада изку ргәалашәарақәа.
Аԥхьаҩцәа ирыдгалоуп 1992 шықәса сентиабр 3 рзы имҩаԥысыз «Кавказтәи арегион ареспубликақәа рнапхгаҩцәа Москватәи реиԥылара» астенограмма. Ақырҭуа-аԥсуа еиҿагылара аҭышәныртәалареи ахымца аанкылареи рзы Москва имҩаԥысыз Урыстәылеи, Қырҭтәылеи, Аԥсни рнапхгаҩцәа реиԥылара аҟынтәи аԥсуа бызшәа ашҟа еиҭагоу астенограмма аԥхьаҩцәа иргәаланаршәо, изызнархәыцуа рацәоуп.
Ашәҟәы ацәа аԥшьбатәи адаҟьаҿы иануп Аԥсны жәлар рпоет Мушьни Лашәриа иажәеинраалоу ироман «Аџьынџь» ацыԥҵәаха.
Аҭыжьымҭа акьыԥхь абеит Аԥсны Раԥхьатәи Ахада Владислав Арӡынба диижьҭеи 80 шықәса аҵра азгәаҭаразы еиҿкаау Аҳәынҭқарратә комиссиа ахарџь ала. Аиқәыршәаҩцәас иамоуп: ашәҟәыҩҩы, ажурнал «Алашара» аредактор хада Анатоли Лагәлаа, апоет Дмитри Габелиа.
Ашәҟәы ҭыжьуп Аҟәа, «Акьыԥхь аҩны» аҟны.