1992 шықәса август 14 аҽны Қырҭтәыла аҳәынҭсовет арбџьар мчқәа имҳәа-мырза Аԥсны иақәлеит. Амчқәа шеиҟарамызгьы хацәнымырха урҭ ирҿагылеит аԥсадгьыл ахьчаҩцәа гәымшәақәа. Убарҭ дыруаӡәкуп ақәыԥшӡа Алмас Қапба.
Абиԥазаҵә Алмас… злахьынҵамҩа 16 шықәса ирҭаӡаз. Иахьатәи ҳамш аҟынӡа ԥсрала иааӡаз… Уара уааӡеит Аԥсны имҩаԥысуаз амилаҭхьыԥшымратә қәԥара активла иалахәыз иреиуаз ашәҟәыҩҩы, ажурналист Владимир Николаи-иԥа Қапба иҩнаҭаҟны. Алмас иан, Фируза Расим-иԥҳа Чамагәуа-Қапба лакәзар, уи акыршықәса инеиԥынкыланы Аҟәатәи агазеҭҭыжьырҭатә типографиаҿы иахьа уажәраанӡагьы аус луеит. Владимири Фирузеи рыҩнаҭаҿы иааӡаз рыҷкәын заҵәы Аԥсны дапатриотны дымгылар залшозма. Уи ус шакәыз уара хаҭала ирурҵабыргит Аԥсны аибашьра аамҭа ианҭагыла.
Алмас, уара уиит Очамчыра араион, ӡынгьы-ԥхынгьы иаҵәала иҭалаҳау Арасаӡыхь ақыҭан. Раԥхьатәи ушколтә шьаҿақәа ахьеихугаз Аҟәатәи ажәабатәи ашкол аҟны ауп, аха нас угәы иҵхоз уқыҭа ԥшӡа Арасаӡыхьҟа угьежьуеит, уаҟа жә-класск уаналга ашьҭахь, Аҟәатәи агазеҭтә типографиаҿы тсеиларҭәаҩыс аусура уалагеит уан Фируза уаалывагыланы. Уара уахь умҩахыҵра уаб иҩызцәа аӡәгьы иџьаҳамшьаӡеит. Избанзар, уанхәыҷыз инаркны лассы-лассы атипографиа уаҭаалон, заанаҵы агәыблра укхьан агазеҭқәа рҭыжьра. Узланагалаз аколлектив зегь бзиа урбон, бзиа уаҳбон агазеҭ «Аԥсны» аҟны аус зуаз зегьы.
Сара хаҭала Ахбиук ажәа ансаҳауа сцәа-сжьы сҭаӡыӡоит. Избанзар,убри ахәыҳаракыра ахақәиҭтәра лахьынҵас изауз абаталион «Горец» алахәцәа шәоуп. Ҳәарада, еилкаауп, ари абаталион аԥҵан Аҟәа ахақәиҭтәразы аҵыхәтәантәи ажәылара аламҭалаз. Уара иулуршеит командаҟаҵаҩысгьы абаталион «Горец» иамаз Вианор Ашбеи иҩызцәеи, ас уҳәар ауазар, «ржьара», иухыҵуаз ушықәсқәа кыр инарыцҵаны ашәҟәы уҽанҵара.
Алмас узлаз агәыԥ адҵа ҷыда анагӡараан командирс ишәымаз Сергеи Аршба шәаԥхьа днагыланы абаталион еиҳа иахьыуадаҩу аҭыԥ ахь шәшырышьҭуаз заа ишыжәдыруазгьы, аӡәгьы шәгәы еиҭамсит. Уимоу, зыҷкәын заҵәы аибашьраҿы дзыцәҭахаз Нелли Ԥацациа-Амҷба, уара анра узызуаз, уаргьы аверталиот иҭабылуаз Нелли лышҟа угьежьит. Амца зкыз аверталиот абылра… уахь Алмас уара уеиҭахынҳәра… агәымшәареи афырхаҵареи … уара уԥсы заҵә агәаӷьра…
Абиԥазаҵә Алмас ианашьоуп «Агәымшәараз» амедал. Уара иулшеит ухатә ԥсҭазаара аҵкьыс Аԥсадгьыл алахьынҵа аҵакы шеиҳаз зегьы дырбара, аԥсуа жәлар Риааира уалагылоуп ушалагылац, 50 шықәса ракәымкәа, ашәышықәсқәа ургәылагыланы уцалоит, уԥсы зыхҭнуҵаз Аԥсны аблақәа ччонаҵы…

Сергеи Агындиа