Аԥсны адәныҟатәи аусқәа рминистр инапынҵақәа назыгӡо Одиссеи Бигәаа абри атәы иҳәеит арезолиуциа данахцәажәоз.

Ҳазну ашықәс азы Қырҭтәыла иаԥшьнагаз арезолиуциа иаҿагыланы рыбжьы арҭеит Урыстәыла, Белоруссиа, Куба, Аҩадатәи Кореиа, Зимбабве, Мали, Никарагуа, Судан, Аекваториалтә Гвинеиа.

Бигәаа игәаанагарала, атәылақәа рхыԥхьаӡара иаҳагьы ирацәахон Аԥсны ахатә позициа аарԥшразы алшара амазҭгьы.

Уи хшыҩзышьҭра азыҟаиҵеит абжьыҭараҿы зҽаанызкылаз рыҩнуҵҟа ишыҟоу Китаи, Индиа, Иран, Еидҵоу Арабтәи Аемиратқәа реиԥш иҟоу анырра ду змоу аҳәынҭқаррақәа.

«Абри ибзиаҵәҟьаны иунарбоит атәылақәа жәпакы шазхиам Қырҭтәылеи уи аҩызцәеи иаахтны ирҳәо амци апропагандеи рымҩа анылара. Урҭ жәашықәсала цәгьа-цәыԥхамшьа  адунеи ауаажәларра зегьы абри рыдыргалоит», – иаҵишьит иара. Ахҵәацәа рызҵаара иаҵанакуа атәы акәзар, раԥхьаӡа иргыланы шьаҭас иҟаҵатәуп Қырҭтәыла иара ахаҭа аҭагылазаашьақәа шаԥнаҵаз абри азҵаара цәырҵырц азы Аԥсны иаҿагыланы аибашьра анхацнарк, – иациҵеит Одиссеи Бигәаа.

Ақырҭуа ган рыӡбахә аҳәоит ахҵәацәеи аҩнуҵҟа еиҭаҵыз ауаа ҳәа изышьҭоуи. Ари азин аганахьала шьаҭанкыла ииашаӡам. «Аҩнуҵҟа еиҭаҵыз ауаа» ҳәа ажәақәа ухы иузархәаӡом Аԥсны аанзыжьыз ақырҭуа милаҭ еиуоу рганахьала. Ақырҭцәа рҭоурыхтә ԥсадгьыл ахь ихынҳәит, мчыла ихҵәаз иреиуаӡам, репатриантцәоуп», – иаҵишьит адипломат.