Афорум аҿы тема хаданы иҟоуп: «Аинвестициатә мҩа: Иацы. Иахьа. Уаҵәы». Афорум аусуратә программа рхы аладырхәит аҳәынҭқарратә мчра аусбарҭақәа рнапхгаҩцәа, Урыстәылатәи, жәларбжьаратәи аилазаарақәа, амассатә информациа ахархәагақәа, аҿартә, аҭҵаарадырратә аилазаарақәа рхаҭарнакцәа. Афорум Урыстәылатәи арегионқәа рҿы аинвестициатә проектқәа аҳәынҭқарра-хазхаҭалатәи аилахәырақәа рыҿиареи аусуратә еилаӡарақәа рыбжьаҵареи рзы аиҿцәажәарақәа рымҩаԥгара иазкуп. Афорум аиҿкаара ахахьы иагеит – Урыстәылатәи Афедерациа аекономикатә ҿиара Аминистрреи Урыстәылатәи Афедерациа Аиҳабыреи адгылара зырҭо Афонд Росконгресс.
Аԥсны Аҳәынҭқарра Ахада зхадараҿы дыҟаз Аԥснытәи аделегациа аилазаара иалан Аԥыза-министр ихаҭыԥуаҩ Џьансыхә Нанба, аекономика аминистр Ҭеимураз Амқәаб, аенергетика аминистр Баҭал Мышәба.
Аԥсны уажәаԥхьагьы Кавказтәи аинвестициатә форум ахы аланархәхьеит. Аԥсны аҭӡы В.Г. Арӡынба ихьӡ зху Жәларбжьаратәи аҳаирбаӷәаза «Аҟәа» аиҭашьақәыргылара азы аинвестициатә проект иазкхеит.
Ишдыру еиԥш, ҳазну ашықәс азы Аԥсны еиҭашьақәыргылан 30 шықәса инареиҳаны еиԥҟьаз авиациатә еимадара. Хымԥада, уи иаҭахын аҳаиртә баӷәазеи уи акәша мыкәшеи шьаҭанкыла реиҭашьақәыргылара. Абарҭқәа ирыбзоураны аҳаирбаӷәаза иаднакылар алшоит бжьаратәла, иара убас ахара иԥыруа аҳаирпланқәа. Еибыҭоуп ҳаамҭа иақәшәо арлашагақәа рыла, иара убас аԥыррақәа радиотехникала реиқәыршәара иазку адгьылаҿтәи ахархәагақәа рыла. Аамҭакалагьы аҳаирбаӷәаза аҩадатәи ахәҭаҿы аргыларақәа мҩаԥысуеит. Уи азеиԥш ҵакыра иартәоит 5 000 метр ԥшьыркца раҟара. Аҳаирбаӷәаза аинфраструктура арҿиара иацҵахоит.
Иара убас аҭӡы аҟны иӡыргоуп Аԥснытәи аҭыжьыҩцәа раалыҵ: иџьбарам, иџьбароу арыжәтәқәа, аџьыка, ачаи, ашәырқәа аус рыдулара аалыҵқәа.